Xonadonida 130 tup “ko‘knori” parvarish qilayotgan shaxsning qilmishi fosh etildi

Yurtimizda koronavirus pandemiyasiga qarshi kurashish davrida aholining tomorqa maydonlaridan oqilona foydalanish masalasiga muhim e’tibor qaratilmoqda. Ammo, mo‘may daromad orttirish ilinjidagi ayrim shaxslar ham borki ular o‘z tomorqalaridan qing‘ir maqsadlarda foydalanishga urinishmoqda.

Yaqinda Andijon viloyati bojxona boshqarmasi Kontrabanda va bojxona qonunchiligi buzilishiga qarshi kurashish bo‘limi xodimlari boshqa huquqni muhofaza qiluvchi idora vakillari bilan hamkorlikda “Qora dori – 2020” tezkor tadbiri doirasida giyohvandlik vositalarining yetishtirilishi bilan bog‘liq jinoyatni fosh etishdi.

Viloyatning Oltinko‘l tumanida yashovchi fuqaro X.Sh.ning yashash xonadoni belgilangan tartibda ko‘zdan kechirilganda, ushbu shaxs o‘z xonadonida 130 tup “ko‘knori” giyohvandlik o‘simligini parvarish qilib kelayotganligi aniqlandi. “Har kim ekkanini o‘radi”, - deya bejiz aytilmas ekan.

Hozirda yuqoridagi holat yuzasidan bojxona organlari tomonidan surishtiruv harkatlari olib borilmoqda.

“Zamin”ni Telegramʻda oʻqing!