Navoiyda kurerlik jo‘natmalari orasida yashirincha 200 mln. so‘mdan ortiq qiymatdagi dori-darmonlar yuborilganligi fosh bo‘ldi

Sifati kafolatlanmagan va bojxona rasmiylashtiruvini tasdiqlovchi hujjatlari bo‘lmagan dori vositalari inson uchun eng aziz ne’mat – sihat-salomatlikka jiddiy xavf tug‘dirishi mumkin.

Respublikamiz bojxonachilari dori vositalarining noqonuniy aylanuviga qarshi tizimli ravishda kurash olib borishmoqda.
Jumladan, Navoiy viloyatida dori vositalarini kurerlik jo‘natmalari orqali noqonuniy ravishda olib kirishga bo‘lgan urinishlarning oldi olindi.

Tezkor tadbirda kurerlik tashkilotlaridan birining nomiga chetdan keltirilgan jo‘natmalar beligangan tartibda bojxona nazoratidan o‘tkaziladi. Mazkur jarayonda jo‘natmalar orasiga yashirilgan holda 13 turdagi sifati kafolatlanmagan dori-darmonlar yuborilganligi aniqlandi.

Saqlash va tashish qoidalariga zid ravishda keltirilgan 300 donadan ziyod mazkur dori-darmonlarning umumiy qiymati 95 mln. 210 ming so‘mni tashkil qilmoqda.

Shuningdek, viloyat bojxonachilari yana bir holatda yo‘l-yuk kuzatuv hujjatlarida qayd etilmagan holda qiymati 12 mln. 600 ming so‘mlik 105 dona “Oksapar” dori vositalarini kurerlik jo‘natmalari orqali olib kirilishining oldini olishdi.

Yana bir holatda esa kurerlik jo‘natmalaridagi sochiq va choyshablar qutilari ichiga dori vositalari ustalik bilan yashirilib, qayta qadoqlangani ma’lum bo‘ldi.

Bojxona xodimlarini chalg‘itish orqali soxta tadbirkorlar 23 turdagi 10 ming donadan ziyod dori vositalarini yashrin ravishda olib kirishmoqchi bo‘lishgan.

Mazkur dorilarning umumiy qiymati esa dastlabki hisob-kitoblarga ko‘ra, 97 mln 190 ming so‘mni tashkil qilmoqda.
Hozirda mazkur holatlar yuzasidan bojxona tekshiruvlari davom ettirilmoqda. “Zamin” yangiliklarini “Odnoklassniki”da kuzatib boring