Facebook o‘zbek tilini biladigan va marketing sohasida tajribaga ega mutaxassisni qidirmoqda

^{Foto: Sky News}
Meta kompaniyasi (Facebook egasi) o‘zbek tilini biladigan mutaxassislar uchun vakansiya ochdi. Nomzod marketing sohasida yetarli tajribaga ega bo‘lishi, foydalanuvchi muammolarini hal qilishi, tematik global muammolar ustida O‘zbekiston jamoasi bilan ishlashi kerak.

Mutaxassis ma’lumotlarga asoslangan jamoaning bir qismi bo‘ladi. Nomzod muammolarni hal qilish va eng muhimi ularning oldini olish orqali kompaniya operatsiyalarini kengaytirishga yordam berishi kerak.

Bu lavozim to‘liq stavkali bo‘lib, yangi ishchi Meta’ning Irlandiya poytaxti Dublindagi ofisida ishlaydi.

Qidirilayotgan nomzod marketing bo‘yicha mutaxassis bo‘lishi, asosiy ko‘rsatkichlarni tahlil qila olishi, katta va murakkab biznes muammolarini hal qila olishi kerak. Bundan tashqari, nomzoddan operatsion muhitda ikki yillik professional tajriba va bakalavr/magistr darajasi talab etiladi.

Ijtimoiy tarmoqlarda turli auditoriya bilan ishlay olish ko‘nikmasi, o‘zbek tilida kuchli yozma va og‘zaki muloqot qobiliyati, mintaqa madaniyatini yaxshi tushunish asosiy talablardan biri.

Texnik jihatdan nomzod Excel va SQL, samarali tahlil va hisobotlarni boshqarish uchun Tableau kabi vizualizatsiya vositalari bilan ishlay olishi kerak.

Facebook va O‘zbekiston
Oldingi yillarda Facebook O‘zbekistonda ko‘p marotaba cheklovlarga uchragan edi. So‘nggi bor bu voqea 2021 yilning noyabrida sodir bo‘lgan edi — sabab kompaniya O‘zbekistonda o‘z serverlarini mahalliylashtirmagan (ushbu sabab bo‘yicha haligacha TikTok, Twitter va boshqa ijtimoiy tarmoqlarning ish faoliyati cheklangan).

Ammo ertasigayoq Facebook’ga bo‘lgan cheklovlar olib tashlandi. Bu voqealarning ortidan «O‘zkomnazorat» boshlig‘i G‘olibsher Ziyayev lavozimidan ozod etildi.

2020 yilda Facebook O‘zbekistonda soliq to‘lovchilar ro‘yxatiga kiritilgan. 2021 yilning dastlabki 9 oyida kompaniya 7,6 mlrd so‘m soliq to‘lagan. “Zamin” yangiliklarini “Youtube”da kuzatib boring