Jaloliddin Ahmadaliev yangi kontsert dasturi va qimmatga sotilayotgan chiptalari haqida gapirdi (foto)

Ijodini boshlaganiga koʻp boʻlmagan xonanda Jaloliddin Ahmadaliev qisqa vaqtda muxlislar nazariga tushib ulgurgan. U uch yildan buyon yakkaxon kontsert dasturini taqdim etmoqda. Qizigʻi shundaki, intervyularida musiqiy jihatdan savodsiz ekanligini aytgan xonandaning kontsertiga chipta topish amrimahol. Topilganing ham narxi ancha baland. “Daryo” ijodkorlari xonandaning kontsertiga tashrif buyurishdi va muxlislarni qiziqtirgan ba'zi savollarga javob olishdi.

Kontsert oldi har bir xonandada hayajon boʻladi. Jaloliddin Ahmadaliev faqat birinchi kun hayajonlanganini va muxlislar yangicha imijdagi kontsertni qanday qabul qilisharkan, deb xavotirga tushgani haqida gapirdi.

^{Foto: “Daryo”}
— Kecha hayajon bor edi, bugun yoʻq. Kontsert kutilgandan ham ziyoda boʻldi, zal muxlislar bilan toʻldi. Bu yilgi kontsertda bir oz oʻzgarishlar boʻlgani uchun odamlarga ozgina erish tuyulgan boʻlishi mumkin-u, lekin yaxshi qabul qilishdi. Ikki yilgi kontsertimiz davomida raqslardan umuman foydalanmasdik. Bu yil tashqi koʻrinishimni va kontsert programmasini bir oz oʻzgartirdik. Raqqosalar ishtirokining sababiga kelsak, bir xillikdan cheklanish ham kerak. Muxlislar yaxshi qabul qilishdi, menimcha.

Xonanda kontsert tayyorgarligida bergan intervyusida sirli duetdoshi haqida aytib oʻtgandi. Ammo duetdosh kontsertning ilk kuni ishtirok etmadi. Buning sababini xonanda quyidagicha izohladi.

^{Foto: “Daryo”}
— Sirli mehmon kontsertimizning soʻnggi kunida ishtirok etadi. U ayrimlar oʻylaganidek Munisa Rizaeva yoki Ozoda Nursaidova emas. Rostini aytsam, u oʻta mashhur xonanda emas. Ammo kimligini hozircha sir saqlayman.

Ayrim xonandalar bir necha kun “Xalqlar doʻstligi” san'at saroyida emas, balki bir kuni “Humo Arena”da kontsert berishni ma'qul koʻrishmoqda. Xonandaning bunga munosabati qanday?

^{Foto: “Daryo”}
— Men uchun “Xalqlar doʻstligi” san'at saroyi qulay, rizqimiz qoʻshilgan ekan bu yil ham shu yerda kontsert beryapman. Keyinchalik balki men ham u yerda kontsert berarman. Kontsert avvalo muxlislar talabidan kelib chiqadi. Shu bilan birga, xonanda daromad ham topadi. Kontsert berish baribir yoqimli jarayon.

Xonanda kontsert chiptalarining ancha qimmatga sotilayotgani haqidagi e'tirozga quyidagicha javob berdi.

^{Foto: “Daryo”}
— Men kontsert chiptalari narxiga aralasholmayman, bu narsalarni tashkilotchilar qilishadi. Men faqat oʻzim uchun sahna dekoratsiyasini qilaman. Xuddi toʻyga kelgandek, kontsertdan ham gonorar olaman. Boshqa masalalar bilan kontsert tashkilotchilarining oʻzlari shugʻullanishadi.

Xonanda san'atdagi raqobatga munosabati va Hamdam Sobirovga qoʻshiq yozdirmasligi haqida ham gapirib oʻtdi.

^{Foto: “Daryo”}
— Men hech kimga hasad qilmayman, ular bilan juda yaqin ham, uzoq ham emasman. Vodiylik ustoz san'atkorlar bilan aloqalarimiz yaxshi. Hamdam Sobirov haqidagi savolingizga kelsak, men undan qoʻshiq olmayman. Chunki men u yoʻnalishda kuylolmayman, bunday kuylash stilim emas, — deydi xonanda Jaloliddin Ahmadaliev. “Zamin” yangiliklarini “Telegram”da kuzatib boring