Shavkat Mirziyoev «Maxtumquli Firogʻiyning 300 yilligi» esdalik medali bilan taqdirlandi

^{Foto: Prezident matbuot-xizmati}
Oʻzbekiston prezidenti Maxtumquli Firogʻiy tavalludining 300 yilligiga bagʻishlangan medal bilan taqdirlandi. Bu haqda Prezident matbuot xizmati xabar berdi.

Qayd etilishicha, shoir va mutafakkir Maxtumquli Firogʻiy yubileyiga bagʻishlangan xalqaro forum yakunida Oʻzbekiston prezidenti Shavkat Mirziyoevni taqdirlash marosimi boʻlib oʻtgan.

Turkman xalqining milliy yetakchisi, Turkmaniston Xalq Maslahati raisi Gurbanguli Berdimuhamedov davlatimiz rahbariga «Maxtumquli Firogʻiyning 300 yilligi» esdalik medalini tantanali ravishda topshirgan.

Avvalroq Shavkat Mirziyoev Ashxobod shahriga tashrifi doirasida Turkman xalqining milliy yetakchisi Gurbanguli Berdimuhamedov bilan uchrashuv oʻtkazgani toʻgʻrisida xabar berilgandi. Uchrashuvda Oʻzbekiston rahbari Turkman xalqining milliy yetakchisiga Maxtumqulining oʻzbek tilida nashr etilgan tanlangan asarlari toʻplamini sovgʻa qilgan.

Turkman xalqining ulugʻ farzandi Maxtumquli Firogʻiy nafaqat turkiy xalqlar, ayni paytda jahon adabiyoti va madaniyati tarixida alohida oʻrin egallagan atoqli shoir va mutafakkirdir. U 1724 yilda tugʻilgan. Xivadagi mashhur Shergʻozixon madrasasida ta'lim olgan.

Maxtumquli turkman she'riy tilini sezilarli darajada oʻzgartirib, uni xalq nutqiga yaqinlashtirgan. Shuningdek, u turkman adabiyoti uchun an'anaviy boʻlgan arab-fors oʻlchovidan voz kechib, uning oʻrniga boʻgʻinlar tizimini joriy qilgan. 1807 yilda vafot etgan va Eronda dafn etilgan. “Zamin” yangiliklarini “Telegram”da kuzatib boring