Toshkent shahrida kutilayotgan konsertlarga kirish qanchaga tushadi?

Toshkentda konsertlar mavsumi qizg‘in davom etmoqda. Eng shov-shuvli dasturlar hali oldinda. Xo‘sh, yaqin oylarda qaysi xonandalar va kulgi jamoalari konsert beradi hamda ularning chipta narxlari qancha?

Avaz Oxun

Qiziqchi Avaz Oxun “Xalqlar do‘stligi” san’at saroyida o‘n kun davom etadigan 12 seanslik konsert dasturini o‘tkazib kelyapti. So‘z ustasining 11-yakkaxon konserti 24 noyabrga qadar davom etadi. Chiptalarni 40 mingdan 300 minggacha bo‘lgan narxda sotib olishingiz mumkin. Konsert to‘liq jonli ijroda o‘tadi.

Surayyo Qosimova

^{Foto: Instagram}
“Arzanda jonim” qo‘shig‘i bilan tanilgan xonanda Surayyo Qosimova 23—24 noyabr kunlari O‘zbekiston kasaba uyushmalari saroyida konsert dasturini taqdim etadi. Chiptalarni 100 mingdan 300 minggacha bo‘lgan narxda sotib olishingiz mumkin. Qo‘shiqlar fonogramma orqali ijro etiladi.

G‘aybulla Tursunov

^{Foto: Instagram}
Yosh ijodkor 25—26 noyabr kunlari “Xalqlar do‘stligi” san’at saroyida “Janona” nomli ilk yakkaxon shou konsertini muxlislar e’tiborga havola qiladi. Chiptalar 70 mingdan 300 minggacha bo‘lgan narxda sotilmoqda. Konsert 100 foiz jonli ijroda o‘tadi.

“Benom” guruhi

^{Foto: Instagram}
Bir yilda ikki marotaba konsert beradigan bu guruh 27—30 noyabrda “Dardim tingla, osmon” nomli shou dasturini muxlislar e’tiboriga taqdim etadi. “Xalqlar do‘stligi”da bo‘lib o‘tadigan to‘rt kunlik konsertning chiptalar narxi 50 ming so‘mdan 450 ming so‘mgacha belgilangan. Konsert doimgidek to‘liq jonli ijroda o‘tadi.

Dj King Macarella

^{Foto: Instagram}
Dj’ning uchinchi yakkaxon konsert dasturi 30 noyabr kuni “Humo arena” muz saroyida bo‘lib o‘tadi. Chiptalarni 50 mingdan 100 minggacha bo‘lgan narxda sotib olishingiz mumkin. Dastur jonli ijroda bo‘ladi.

“Setora” guruhi

^{Foto: Instagram}
Afsonaviy “Setora” guruhi so‘nggi bor 2004 yilda konsert dasturini o‘tkazgandi. 20 yillik tanaffusdan so‘ng guruh to‘liq tarkibda sahnaga qaytyapti. 1—3 dekabrda “Xalqlar do‘stligi” san’at saroyida bo‘lib o‘tadigan konsert besh seansdan iborat. 1—2 dekabr kunlari konsert ikki seansda — 15:00 dan 17:00 gacha hamda 19:00 dan 21:00 gacha. Chiptalar narxi esa hayratlanarli — 44 mingdan 770 minggacha belgilangan. Qo‘shiqlar fonogramma orqali ijro etiladi.

Bunyodbek Saidov

^{Foto: Instagram}
Xonanda 4—8 dekabr kunlari “Xalqlar do‘stligi” san’at saroyida “Fayzingiz boshqacha” nomli konsert dasturini taqdim etadi. Chiptalar narxi 40 mingdan 500 minggacha belgilangan. Qo‘shiqlar fonogramma orqali ijro etiladi.

Mirshakar Fayzullayev

^{Foto: Instagram}
Yumorist Mirshakar Fayzullayev boshchiligida 7 dekabr kuni “Zarafshon” konsert zalida stendap shou bo‘lib o‘tadi. Dasturda qiziqchi Ozod Shukrulloyev ham qatnashadi. Chiptalarni 70 mingdan 350 minggacha bo‘lgan narxda xarid qilishingiz mumkin.

“Dizayn” jamoasi

^{Foto: Google}
Kulgi jamoasi “Xalqlar do‘stligi” saroyida 9—16 dekabr kunlari navbatdagi konsert dasturini o‘tkazadi. Jonli ijroda o‘tadigan tomoshaning chiptalar narxi 40 mingdan 450 minggacha belgilangan.

Mirzabek Xolmedov

Mirzabek Xolmedov hamda Mirzo teatri “Sovuq tushdi, kulgi qarg‘alar qaytishdi” nomli konsert dasturini 17—20 dekabr kunlari “Xalqlar do‘stligi” san’at saroyida o‘tkazadi. Konsert chiptalarini 30 mingdan 400 minggacha xarid qilishingiz mumkin.

“Sahar” guruhi

Guruh 25—26 dekabr kunlari “Xalqlar do‘stligi”da jonli ijrodagi konsert dasturini taqdim etadi. Chiptalar 30 mingdan 400 minggacha bo‘lgan narxda belgilangan.

Osman Navruzov

^{Foto: Instagram}
2025 yilning 15 yanvarida xorazmlik san’atkor “Xalqlar do‘stligi” san’at saroyida navbatdagi konsertini beradi. Chiptalarni 30 mingdan 400 minggacha bo‘lgan narxlarda xarid qilishingiz mumkin. Qo‘shiqlar fonogramma orqali ijro etiladi.

Sevinch Ismoilova

^{Foto: Instagram}
Xorazmlik yana bir qo‘shiqchi Sevinch Ismoilova 28 yanvar kuni “Xalqlar do‘stligi”da konsert dasturini muxlislari e’tiboriga havola qilyapti. Chiptalar 50 mingdan 500 minggacha narxda belgilangan. Konsertda fonogrammadan foydalaniladi.

Yulduz Usmonova

^{Foto: Instagram}
Muxlislar orasida eng uzoq kutilayotgan konsert, shubhasiz, Yulduz Usmonovaniki. Salkam uch hafta davom etadigan konsert 8—27 fevral kunlari “Xalqlar do‘stligi”da bo‘lib o‘tadi. Chipta narxlari 50 mingdan 550 minggacha belgilangan. Qo‘shiqlar to‘liq jonli ijroda kuylanadi.

Manba: Daryo.uz “Zamin” yangiliklarini “Vkontakti”da kuzatib boring