Shvarseneggerga eng ko‘p pul keltirgan film — «Egizaklar»mi?

Shvarsenegger uchun eng daromadli film “Terminator” emas, balki “Egizaklar” bo‘lib chiqdi

Gollivud yulduzi Arnold Shvarsenegger o‘z karyerasida eng ko‘p daromad keltirgan filmini ochiqladi va bu ko‘pchilik kutganidek mashhur “Terminator” emas, balki 1988 yilda suratga olingan “Egizaklar” komediyasi bo‘lib chiqdi. Bu haqda u Endi Koen olib boradigan “Watch What Happens Live” tok-shousida gapirdi.

Aktyor intervyu chog‘ida shunday dedi:

“Bu 'Egizaklar' filmi edi, chunki biz u paytda gonorar olmadik. Hech qanday maosh, to‘lov yo‘q edi. Biz shunchaki daromaddan foiz olishga kelishib oldik. Bu esa o‘zini to‘liq oqladi – filmdan juda katta foyda ko‘rdik”.

Shvarsenegger aniq raqamni oshkor qilmadi, ammo bu summa 40 million dollardan yuqori bo‘lganini ta’kidladi. Uning so‘zlariga ko‘ra, ushbu film unga eng katta moliyaviy foyda keltirgan loyiha bo‘lgan.

“Egizaklar” filmida Shvarsenegger ideal, sodda va samimiy erkak obrazini namoyon etadi. U bir kuni o‘zining umuman o‘xshamaydigan, past bo‘yli va yumorga boy egizagi borligini bilib qoladi. Ushbu rolda esa mashhur aktyor Denni De Vito namoyon bo‘lgan.

Shuningdek, aktyor filmning davomiy qismi ham rejalashtirilganini bildirdi. “Uch egizak” deb nomlangan ushbu loyihada uchinchi aka rolini Eddi Merfi ijro etishi kerak edi. Ammo asli rejissyor Ayvan Raytman film suratga olish ishlari boshlanishidan avval vafot etgani sababli, loyiha amalga oshmay qoldi.

Arnold Shvarsenegger avvalroq “Egizaklar” filmida gonorarsiz ishtirok etish orqali kinostudiyalarga komediya janrida ham o‘zini namoyon eta olishini isbotlashni maqsad qilganini aytgan edi. Kam budjetiga qaramay, film jahon bo‘ylab 200 million dollardan ortiq daromad keltirgan va uning aktyorlik faoliyatidagi burilish nuqtalaridan biriga aylangan.

Bu voqea yana bir bor shunchaki mashhur franshizalar emas, balki haqiqiy aktyorlik tavakkali va ijodiy qarorlar orqali ham katta moliyaviy muvaffaqiyatlarga erishish mumkinligini ko‘rsatadi. “Zamin”ni Telegramʻda oʻqing!