Taniqli aktyor Tom Xolland suratga olish maydonida olingan fotosuratlarni o‘zining taqiqlangan ijtimoiy tarmoqdagi sahifasida e’lon qildi. Ushbu kadrlar “O‘rgimchak-odam: Yangi kun” nomli yangi film ustida olib borilayotgan ish jarayonini aks ettiradi.
Aktyor kadrlarda yangilangan qahramon kostyumida ko‘rinib, kinoijodkorlar bilan suhbatlashmoqda. Ma’lumotlarga ko‘ra, film Shotlandiyaning eng yirik shahri – Glazgoda suratga olinmoqda. Bu shahar bir muddatga Marvel kinovselenaga xos bo‘lgan Nyu-York shahriga aylantirilgan.
“O‘rgimchak-odam: Yangi kun” filmi ustida ishlash 2025 yil avgust oyida boshlangan. Hali suratga olish yangidan boshlangan bir paytda, ijtimoiy tarmoqlarda filmning ilk tizeri e’lon qilingan edi. Tom Xolland o‘z roliga qayta qaytgan, shuningdek Zendeya (Meri Jeyn) va Jeykob Batalon (Ned) ham yangi loyihaga jalb etilgan.
Film rejissyori sifatida Destin Deniel Kretton tayinlangan. Ssenariy ustida esa yana Kris Makkenna va Erik Sommers ishlamoqda. Yangiliklarga ko‘ra, filmda 1990 yillardagi mashhur animatsion serialning muhiti qayta yaratiladi, biroq asosiy syujet tafsilotlari hozircha oshkor qilinmagan.
Kutilgan premera sanasi — 2026 yilning 31 iyul.
Manba: Peopletalk
“Zamin”ni Telegramʻda oʻqing!
