Gollivud yulduzi Andjelina Joli hayotida katta o‘zgarishlar arafasida turibdi. Insayderlar ma’lumotiga ko‘ra, aktrisa Los-Anjelesdagi tarixiy uyini sotish va AQSHni tark etishni rejalashtirgan. U hozirda yangi yashash joyini tanlash jarayonida, ammo bu albatta Amerikadan tashqarida bo‘ladi, deb yozmoqda Peopletalk.
Andjelinaning Los-Anjelesda qolishi, asosan, Bred Pitt bilan nikoh davridagi bolalar tarbiyasi bo‘yicha kelishuv shartlari bilan bog‘liq edi. 2016 yildagi ajrashuvdan keyin u bolalar manfaati uchun shu yerda qolgan. Endi esa, eng kichiklari — egizaklar Noks va Viven — 2026 yil iyulida 18 yoshga to‘lganidan so‘ng, u shahar bilan xayrlashishni rejalashtirmoqda.
1913 yilda qurilgan va 2017 yilda sotib olingan, ilgari mashhur rejissyor Sesil B. DeMillga tegishli bo‘lgan villa aktrisa hamda uning olti farzandiga tinch, yolg‘izlikdagi hayot va xavfsiz muhit yaratdi.
Joli intervyularida Los-Anjelesdan ko‘chish orzusi haqida bir necha bor aytgan va bu qaror unga shaxsan katta xotirjamlik olib kelishi ta’kidlanmoqda.
Shu bilan birga, Bred Pitt bilan ajrashganiga qaramay, ular o‘rtasidagi nizo hali ham tugamagan. Yaqinda Pitt Jolidan oilaviy sharob ishlab chiqariladigan korxona bo‘yicha sud ishi uchun shaxsiy yozishmalarini taqdim etishni talab qildi.
