O‘zbek teatr va kino san’ati yana bir unutilmas kunni qarshi oldi. Prezident Shavkat Mirziyoyev 23 avgust kuni imzolagan farmonga ko‘ra, bir qator taniqli aktyorlar – Saida Rametova, Karim Mirhodiyev va Tohir Saidov “O‘zbekiston Respublikasi xalq artisti” faxriy unvoni bilan taqdirlandi.
Farmonda ta’kidlanishicha, ular mamlakat mustaqilligini mustahkamlash, o‘zining serqirra iste’dodi, teatr va kino sohasidagi samarali faoliyati hamda xalq ma’naviyatini yuksaltirishga qo‘shgan beqiyos hissasi uchun ushbu yuksak unvonga sazovor bo‘ldi.
Saida Rametova – o‘zbek kino va teatr sahnasining eng sevimli yulduzlaridan biri. U ko‘plab film va seriallarda o‘ziga xos obrazlar yaratib, muxlislar qalbidan joy olgan. Aktrisaning ilk katta qadamlaridan biri 1995 yildagi “Bomba” filmidagi Jamila obrazi bo‘lsa, keyinchalik “Sarvinoz”da Maryam opa, mashhur “Superkuyov”da Munira opa – Sardorning onasi rollari orqali katta shuhrat qozondi. Keyingi yillarda ham u “Uchar qiz”, “Majruh”, “Farishta” kabi filmlarda bosh rollarni ijro etib, o‘z ijodiy yo‘lini yanada yuksaltirdi. 2021 yilda esa xalqaro loyiha “Mendirman Jaloliddin” serialida ishtirok etib, o‘z mahoratini yanada keng maydonga olib chiqdi. Umuman olganda, Saida Rametova 80 dan ortiq film va seriallarda turli qiyofalarni yaratgan.
Karim Mirhodiyev esa o‘zbek sahnasida katta iz qoldirgan ustoz aktyorlardan biri hisoblanadi. 1954 yil 29 iyulda Buxoroda tug‘ilgan u, Toshkentdagi Ostrovskiy nomidagi Davlat teatr va rassomlik institutida tahsil olgan. Keyinchalik Abror Hidoyatov nomidagi teatrda (sobiq Yosh gvardiya teatri) faoliyat yuritib, 60 dan ziyod spektaklda turli rollarni ijro etgan. 2001 yilda unga “O‘zbekistonda xizmat ko‘rsatgan artist” unvoni berilgan bo‘lsa, bugungi kunga kelib uning san’atga qo‘shgan xizmatlari yanada yuksak baholandi.
Tohir Saidov esa Xorazm viloyatining ma’ruf san’atkorlaridan. 1965 yilda tug‘ilgan aktyor o‘z ijodiy yo‘lini 1991 yilda O‘zbek milliy akademik drama teatridan boshlagan va shundan beri 60 dan ziyod spektakllarda ishtirok etgan. Unga katta shuhrat keltirgan rol “Ko‘ngil ko‘chalari” serialidagi gadoy qiyofasi bo‘ldi. Shuningdek, “Shaytanat” va “Sardor” seriallari, “So‘g‘diyona”, “Chavandoz”, “18 kvadrat” kabi 20 dan ortiq filmlardagi rollari orqali keng tanildi. 2005 yilda u “O‘zbekistonda xizmat ko‘rsatgan artist” unvoniga sazovor bo‘lgan edi.
Shubhasiz, bugungi taqdirlash nafaqat aktyorlarning shaxsiy yutuqlari, balki butun o‘zbek teatri va kinosiga berilgan katta e’tirof sifatida ahamiyat kasb etadi. Saida Rametova, Karim Mirhodiyev va Tohir Saidov kabi san’atkorlar o‘z ijodi bilan nafaqat sahna, balki millionlab muxlislar qalbini zabt etdi.
Bu faxriy unvon ularning ijodiy yo‘lini yanada yorqin davom ettirishga, yangi izlanish va g‘alabalarga undaydi. Chunki xalq sevgan san’atkorlar har doim qadrlanadi.
“Zamin”ni Telegramʻda oʻqing!
