Hind yulduzi Shohrux Xonning boyligi 1,4 milliard dollarga yetdi
Hind kinosanoatida yangi tarix yozildi — Bollivudning mashhur aktyori va prodyuseri Shohrux Xon rasman milliarderlar qatoriga kirdi. Bu haqda Hurun India Rich List 2025 va BBC nashrlari xabar berdi.
Ma’lumotlarga ko‘ra, 59 yoshli aktyorning jami boyligi 1,4 milliard dollarga yetgan. Shu tariqa, u Bollivuddagi birinchi va yagona dollar milliarderi sifatida tarixga kirdi. Bu holat nafaqat uning shaxsiy yutug‘i, balki Hindiston kino va ko‘ngilochar sohasining jahon miqyosidagi iqtisodiy salohiyatini ham namoyon etmoqda.
Hurun ro‘yxati tahlilchilari ta’kidlashicha, Shohrux Xonning moliyaviy muvaffaqiyati Hindiston iqtisodiyotining yangi sohalarga — sport, shou-biznes va intellektual mulk yo‘nalishlariga faol kirib borayotganidan dalolat beradi. Ularning fikricha, u faqat aktyor sifatida emas, balki uzoqni ko‘ra bilgan tadbirkor sifatida ham ulkan natijalarga erishgan.
Shohrux Xonning asosiy daromad manbalari — uning Red Chillies Entertainment kinokompaniyasi, IPL ligasida ishtirok etuvchi Knight Riders Sports kriket klubi, yirik reklama shartnomalari hamda qimmatbaho ko‘chmas mulk investitsiyalaridir. Uning Dubay, London va Mumbaydagi mulklari yuksak baholangan.
Shuningdek, aktyorning brendi va shaxsiy nufuzi Hindiston chegaralaridan ancha uzoqqa chiqqan. U dunyo miqyosida “Bollywood King” sifatida tan olingan bo‘lib, so‘nggi yillarda Netflix, Amazon va boshqa xalqaro striming platformalar bilan hamkorlikdagi loyihalarda ishtirok etmoqda.
Hurun India Rich List ma’lumotlariga ko‘ra, Shohrux Xonning moliyaviy holati Arnold Shvarsenegger, Rianna, Taylor Svift va Tayger Vuds kabi jahon superiqtisodiy yulduzlar darajasiga yaqinlashgan.
Tahlilchilar fikricha, u nafaqat Bollivudning, balki butun Hindistonning madaniy va iqtisodiy elchisiga aylandi. Milliarderlik maqomi esa uning 30-yildan ortiq faoliyatidagi mehnat, aql va qat’iyatning tabiiy samarasidir.
“Zamin”ni Telegramʻda oʻqing!
