Lazgi — nafaqat Xorazmning, balki butun O‘zbekistonning yuragida yashaydigan, insonga quvonch va ruh bag‘ishlaydigan milliy raqs sanaladi. Uning ildizlari necha asrlar oldiga borib taqaladi: olimlar Lazgining tarixi qadimgi Zarafshon va Amudaryo orasidagi ko‘hna madaniyat bilan bog‘liqligini ta’kidlaydi.
Afsonalarga ko‘ra, Lazgi avval Amudaryo sohillarida yashagan dehqon va chorvadorlarning tabiat bilan bog‘liq shodlik harakatlaridan kelib chiqqan. Ular yomg‘ir yog‘ganda yoki hosil mo‘l bo‘lganda quvonchdan sakrab, qo‘l va yelka harakatlari bilan tabiatga minnatdorlik bildirganlar. Shu tabiiy harakatlar asta-sekin ritm va qadamlar tizimiga aylanib, Lazgi shakllangan.
Lazgi raqsining eng ajralib turadigan jihati — ruhning ozodligi va erkin harakatlar. Raqqos qo‘llarini parvoz qilgan qushdek yoyib, yelka va bosh harakatlari bilan hissiyotni ifoda etadi. Bu nafaqat badanning, balki qalbning ham harakatidir.
Xorazm Lazgisi o‘zining tez sur’ati, jo‘shqin qadamlari va jonli musiqasi bilan ajralib turadi. U jahon sahnalarida ham tan olingan: YUNЕSKO 2019 yilda Lazgi raqsini insoniyatning nomoddiy madaniy merosi ro‘yxatiga kiritgan.
Bugun Lazgi — Xorazmning faxri, o‘zbek xalqining iftixori. U faqat raqs emas — u hayotning o‘zi, shodlik, erkinlik va milliy g‘ururning jonli ifodasidir.
“Zamin”ni Telegramʻda oʻqing!
