Farg‘ona viloyatidan yetishib chiqqan taniqli xonanda Rahmatillo Yusupov 44 yoshida hayotdan ko‘z yumdi. Mavjud ma’lumotlarga ko‘ra, u so‘nggi vaqtlarda og‘ir xastalik bilan kurashib kelgan va shifokorlarning barcha sa’y-harakatlariga qaramasdan, uning hayotini saqlab qolishning iloji bo‘lmagan.
Marhum san’atkor o‘zining samimiy ijrosi, dardli ovozi va xalqqa yaqin qo‘shiqlari bilan ko‘plab muxlislar qalbidan joy olgan edi. Ayniqsa, “Ketgim kelmayapti onajon”, “Kelinchak” kabi qo‘shiqlari orqali keng ommaga tanildi. Uning sahnadagi obrazi, qiyofasi va ijro uslubi ko‘p jihatdan marhum ustoz san’atkor Oxunjon Madaliyevni eslatar edi. Shu bois, muxlislar va san’at muhiti vakillari orasida Rahmatillo Yusupovni “ikkinchi Oxunjon Madaliyev” deb atash holatlari ham uchrab turardi.
Rahmatillo Yusupov 1981 yil 15 sentyabr kuni Farg‘ona viloyatida tug‘ilgan. U ijodiy faoliyati davomida 100 dan ortiq mualliflik qo‘shiqlarini yaratgan bo‘lib, ularning aksariyati muhabbat, ota-ona qadri va hayot haqidagi samimiy kechinmalarga bag‘ishlangan edi. U qo‘shiqlarida oddiy odamlar tuyg‘usini, dard va umidlarini jonli tarzda ifodalay olgan xonandalardan biri sifatida e’tirof etilardi.
Marhum xonanda oilali bo‘lib, ikki nafar farzandning otasi edi. Uning bevaqt vafoti nafaqat yaqinlari, balki butun san’at ixlosmandlari uchun og‘ir yo‘qotish bo‘ldi. Rahmatillo Yusupovning qo‘shiqlari esa uni sevgan muxlislar qalbida yana uzoq yillar davomida yangrab turishi shubhasiz.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
