Londonda Shekspir yashagan uy manzili aniqlandi

Uilyam Shekspir hayoti bilan bog‘liq yana bir muhim tarixiy topilma aniqlandi. London Qirollik kolleji matbuot xizmati tadqiqotchilari buyuk dramaturgga tegishli bo‘lgan uy qayerda joylashganini aniqlashga muvaffaq bo‘lishdi.

Ma’lum qilinishicha, Shekspir 1613 yilda — vafotidan uch yil avval — Londondagi yagona mulkini sotib olgan. Ushbu uy poytaxt markaziga yaqin, nisbatan sokin va osoyishta ko‘chalardan birida joylashgan bo‘lgan. Afsuski, mazkur bino bugungi kungacha saqlanib qolmagan.

Tadqiqotga boshchilik qilgan olima Lyusi Manro qadimiy arxiv hujjatlarini sinchiklab o‘rganib, uyning aniq joylashuvini aniqladi. U 1668 yilda tuzilgan eski xaritalar, mulk hujjatlari va boshqa tarixiy manbalarga tayangan holda izlanish olib bordi. Mazkur hujjatlar Shekspir vafotidan keyin ham saqlanib qolgan ma’lumotlarga asoslangan.

Avvalroq tarixchilar Shekspir 1613 yilda teatrda yuz bergan yong‘indan so‘ng Londonni tark etib, Stratfordga qaytgan deb hisoblashgan. Biroq yangi dalillar u aslida Londonda qolib, teatr hayoti va ijodiy faoliyatini davom ettirganini ko‘rsatmoqda.

Aniqlanishicha, Shekspir uyi qadimiy dominikan monastiri yaqinida, hozirgi Sent-Endryus-Xill hududiga to‘g‘ri keladi. Bugungi kunda bu joyda XIX asrda barpo etilgan binolar qad rostlagan.

Qiziqarli jihati shundaki, tadqiqotchilar hozirda shu hududda o‘rnatilgan ko‘k yodgorlik lavhasi aynan Shekspir uyi joylashgan nuqtaga to‘g‘ri kelishini ham aniqlashdi.

Mutaxassislar fikricha, ushbu kashfiyot buyuk adibning hayotining so‘nggi yillari haqida yangi qarashlarni shakllantiradi. Bu esa Shekspir Londonda nafaqat yashagan, balki ijodiy faoliyatini ham faol davom ettirgan bo‘lishi mumkinligini yana bir bor tasdiqlaydi.