Mirziyoyev “Toshkent-Sharqiy”ni ko‘zdan kechirdi: yangi aeroport zamonaviy darajada qurilmoqda

O‘zbekiston Prezidenti Shavkat Mirziyoyev 18-iyun kuni qurilishi jadal sur’atda davom etayotgan “Toshkent-Sharqiy” aeroportida bo‘lib, uning texnik va infratuzilmaviy imkoniyatlari bilan tanishdi. Bu obyekt nafaqat poytaxt, balki Yangi Toshkent va butun Toshkent viloyati uchun istiqbolli havo yo‘llaridan biriga aylanmoqda.

Davlatimiz iqtisodiyoti izchil o‘sishi, xorijiy sarmoya va sayyohlar oqimining ko‘payishi transport infratuzilmasini mustahkamlashni talab etmoqda. Shu maqsadda, yurtimizda barcha transport turlarini modernizatsiya qilishga jiddiy e’tibor qaratilmoqda. Aeroportlar esa bu jarayonda strategik ahamiyatga ega bo‘lgan nuqta sanaladi.

Qayta qurilayotgan “Toshkent-Sharqiy” aeroporti ham ana shunday muhim loyihalardan biri. Bu yerda 4 kilometrli uchish-qo‘nish yo‘lagi zamonaviy talablar asosida yangilanib, eng og‘ir va katta samolyotlarni qabul qilish imkoniga ega bo‘ldi.

Shu bilan birga, yuqori martabali mehmonlar hamda biznes aviatsiya uchun mo‘ljallangan ikkita alohida terminal, perronlar va yopiq angarlar qurilmoqda. Loyiha doirasida aeroport ICAO III-A toifasiga mos, noqulay ob-havo sharoitlarida ham samarali ishlaydigan zamonaviy radiotexnika va meteorologiya uskunalari bilan jihozlanadi.

Samolyotlarning texnik xizmat ko‘rsatuvi uchun qurilayotgan yopiq angarlar xavfsiz va barqaror saqlash sharoitlarini yaratib beradi. Bunday imkoniyatlar nafaqat milliy aviatsiya salohiyatini oshiradi, balki biznes-turizmni ham rag‘batlantiradi.

Aeroportning qulay joylashuvi uni Yangi Toshkent shaharsozlik loyihasi bilan uyg‘unlashtirib, transport logistikasini yanada samarali qiladi. Shu orqali Toshkent viloyatining sayyohlik va iqtisodiy imkoniyatlari yanada kengayadi.

Prezident Mirziyoyev qurilish ishlarini jadallashtirish, chet ellik investorlar uchun qulay shart-sharoit yaratish, hamda terminallar dizayni va xizmat sifatini xalqaro mezonlarga moslashtirish yuzasidan mutasaddilarga aniq topshiriqlar berdi. “Zamin”ni Telegramʻda oʻqing!