Yangi haftada yurtimizda havo harorati qanday bo‘ladi?

O‘zbekistonda hafta boshidanoq havo harorati yana rekord darajalarga ko‘tariladi. "O‘zgidromet" tomonidan e’lon qilingan 21–24 iyul kunlari uchun ob-havo prognoziga ko‘ra, respublikani qaynoq va quruq kunlar kutmoqda. Yangi haftada mamlakatning deyarli barcha hududlarida yomg‘irsiz, biroz bulutli osmon va yuqori harorat ustunlik qiladi.

Hafta davomida respublikani jaziramali havo qamrab oladi: dushanba va seshanba kunlari, ayniqsa, mamlakatning janubi va cho‘l hududlarida harorat 45° darajagacha, boshqa viloyatlarda 43° darajagacha ko‘tariladi. Chorshanba va payshanba kunlari esa havo harorati 1–2 daraja pastroq bo‘lishi kutilyapti.

Qoraqalpog‘iston va Xorazm viloyatida bugungi kunda yomg‘irsiz va biroz bulutli osmon kuzatiladi, shamol esa sharqdan kuch bilan esadi va chang-to‘zonlar ehtimoli yuqori. Harorat 21–23 iyul kunlari 35–40°, 24 iyulda esa 37–42° oralig‘ida, kechasi 22-27° bo‘ladi.

Buxoro va Navoiy viloyatlarida ham juda issiq ob-havo saqlanib turadi. Kechasi 24–29° daraja, kunduzi esa 38–43° darajada saqlanishi kutilmoqda. Shamol kuchli, ayrim joylarda 18 m/s gacha chang-to‘zon ko‘tarilishi mumkin.

Toshkent, Sirdaryo, Jizzax va Samarqand viloyatlarida dushanba va seshanba kunlari harorat 38–43°, kechasi 23-28°, keyinchalik bir oz pasayib, 36–41° oralig‘ida bo‘ladi. Hududda ham sharqdan shamol kuchayadi, changli havo ehtimoli yuqori.

Qashqadaryo va Surxondaryo viloyatlarida eng yuqori harorat kuzatiladi: 21–22 iyulda 40–45°, 23–24 iyulda 38–43° bo‘lishi kutilyapti. Harorat kechasi 25–30° gacha issiq bo‘ladi.

Andijon, Namangan va Farg‘ona viloyatlarida ham issiq kunlar davom etadi: dushanba va seshanbada 36–41°, payshanbada 35–40° oralig‘ida. Harorat kechasi 23-28° bo‘ladi. Shamol sharqdan 5-10 m/s tezlikda esadi, ammo havo hamon yomg‘irsiz va bulutli bo‘ladi.

Tog‘li hududlarda biroz yengillik bor: 21–22 iyulda kunduzi 30–35°, 23–24 iyulda esa 27–32° gacha pastlaydi. Harorat kechasi 19-24° bo‘ladi. Havo bulutli, lekin yomg‘ir kutilmaydi, shamol ayrim joylarda 18 m/s gacha kuchayadi.

Mutaxassislar jamoatchilikni to‘g‘ridan to‘g‘ri quyosh nurlaridan himoyalanish, ko‘proq suv ichish va havoning issiqligiga mos harakat qilishga chaqirmoqda. Yaqin haftada aholi, ayniqsa, keksa va bolalar sog‘lig‘iga e’tibor berish zarur. Haroratning balandligi va changli havo ishlab chiqarish, qishloq xo‘jaligi hamda shahar hayotida qator noqulayliklar keltirishi mumkin.

Haftalik ob-havo esa hayotimizga yana bir bor tabiat bilan ehtiyotkor munosabatda bo‘lish kerakligini eslatib turibdi. Jazirama, shamol va quruqlik — iyul oyi davrida barchamizni sinovga chaqiryapti. “Zamin”ni Telegramʻda oʻqing!