Navoiyda havoni ifloslantirayotgan tutun manbai rasman ochiqlandi

So‘nggi kunlarda Navoiy shahri va uning atrofida tarqalayotgan qora tutun muammosi jamoatchilik orasida keng muhokamaga sabab bo‘ldi. Ijtimoiy tarmoqlarda tarqalgan videolar va fotolarda havoning qattiq ifloslangani, odamlarning sog‘ligiga xavf solayotgani haqida xabarlar berildi. Masalaning jiddiy tus olishi sababli “Navoiyazot” AJ matbuot xizmati rasmiy bayonot berdi.

Bayonotda aytilishicha, tarqalayotgan changsimon tutun “Navoiyazot” AJ faoliyatiga aloqador emas. Korxona mutasaddilari O‘zbekiston Ekologik partiyasi Navoiy viloyat kengashi va boshqa ekologik organlar bilan hamkorlikda vaziyatni o‘rganishga kirishgan. Mazkur o‘rganishlar natijasida 21 iyul kuni ertalabgi vaqtda hosil bo‘lgan qora tutun sobiq Navoiy elektrokimyo zavodi o‘rnida faoliyat yuritayotgan ayrim xususiy korxonalardan tarqalayotgani aniqlangan.

Korxona rahbariyati bu masalada o‘z shaffofligini namoyon etish maqsadida ammiakli selitra ishlab chiqarish sexi hududiga qo‘shimcha videokuzatuv kameralari o‘rnatgan. Bu orqali “Navoiyazot” AJ faoliyati bilan tutun tarqalishi o‘rtasida bog‘liqlik yo‘qligi yana bir bor tasdiqlangan.

Ma’lumotlarga ko‘ra, Navoiy shahrida changsimon tutun ilgari 13 va 19 iyul kunlari ham kuzatilgan. O‘shanda Navoiy viloyati Ekologiya boshqarmasi bu holatni “Navoiyazot” korxonasi faoliyati bilan bog‘lagan edi. Ammo keyingi tahlillar va videokuzatuv yordamida bu ayblovlar asossiz ekanligi ma’lum bo‘ldi.

Ayni paytda, sobiq elektrokimyo zavodi hududidagi xususiy korxonalarning atmosferaga tarqatayotgan chiqindilarini o‘rganish bo‘yicha davlat organlari tomonidan tekshiruv ishlari davom etmoqda. Tegishli ma’lumotlar va yakuniy xulosalar asosida jamoatchilikka qo‘shimcha ma’lumot berilishi kutilmoqda.

Ekologlar fikricha, havo sifatiga salbiy ta’sir ko‘rsatayotgan bunday holatlar aholi sog‘ligi uchun katta xavf soladi. Shu bois, mas’ul idoralar tezkor tekshiruvlar olib borib, vaziyatga aniqlik kiritishlari muhim ahamiyatga ega.

Navoiy viloyati aholisi, ayniqsa markaziy shahar atrofida yashovchi fuqarolar ekologik muvozanatni saqlash va havo ifloslanishining oldini olish maqsadida bunday holatlarga befarq bo‘lmaslikka, shubhali hid yoki tutun payqalsa, zudlik bilan tegishli tashkilotlarga murojaat qilishga chaqirildi. “Zamin”ni Telegramʻda oʻqing!