Yurtimizda issiqxona xo‘jaliklarini rivojlantirish va ularning raqobatbardoshligini oshirish yo‘lida muhim islohotlar amalga oshirilmoqda. Bugungi kunda respublikada 5,1 ming gektar maydonda issiqxonalar faoliyat yuritmoqda va so‘nggi yetti yil ichida ularda yetishtiriladigan mahsulot hajmi 110 ming tonnadan 546 ming tonnagacha ortdi. Bu esa, mamlakatimiz oziq-ovqat xavfsizligini ta’minlashda katta o‘rin egallaydi.
Biroq, sohadagi muammolar ham yo‘q emas. Tadbirkorlar kredit yuki, o‘g‘it narxi qimmatligi va uzluksiz gaz ta’minoti yetishmasligidan shikoyat qilmoqda. Misol uchun, 600 gektardan ziyod maydonda issiqxona faoliyati to‘xtagan bo‘lsa, 128 gektari qarzdorlik sababli bank balansiga o‘tgan. Shu bois, davlat tomonidan issiqxona xo‘jaliklarini qo‘llab-quvvatlash choralari joriy etilmoqda.
Yangi imkoniyatlar va yengilliklar:
-
Ichki bozor bilan birga eksport majburiyatini olgan, tabiiy gazda ishlayotgan issiqxonalarga qishki mavsumda gaz kafolatli hajmda beriladi.
-
Ko‘mir yoki boshqa muqobil isitish tizimida ishlaydigan va eksport majburiyatini olgan issiqxonalarga ham tabiiy gazga qaytish imkoni yaratiladi.
-
Aylanma mablag‘ ta’minoti uchun oldindan to‘lov oktyabr-mart oylariga 50 foiz qilib belgilanadi va 1 oktyabrga qadar shartnoma imzolanadi.
-
Muqobil isitish tizimiga o‘tgan issiqxonalarga ajratilgan kredit muddati uzaytiriladi.
-
Issiqlik nasoslari texnologiyalaridan foydalanuvchi issiqxonalarga xarajatlarning 20 foizigacha qismi, kredit bo‘yicha esa 4 foizi qoplab beriladi.
-
Bundan buyon issiqxonalar, toifasidan qat’i nazar, yer solig‘ini qishloq xo‘jaligi yerlari stavkasida to‘laydi.
-
2028 yilgacha issiqxona ishchilari uchun ijtimoiy soliq stavkasi 12 foizdan 1 foizga tushiriladi.
Bundan tashqari, Soliq qo‘mitasiga butun tizim bo‘yicha tahlil va monitoringni kuchaytirish, issiqxonalardan qisqartirilgan gazning boshqa sohalarda qay darajada samarali ishlatilayotganini o‘rganish va agar qo‘shilgan qiymat past bo‘lsa, gazni yana issiqxonalarga yo‘naltirish topshirildi. Ekologik jihatdan esa, Toshkent viloyatidagi issiqxonalar faoliyatining havo sifatiga salbiy ta’siriga oid muammolar keskin hal qilinishi lozim.
Prezident o‘z chiqishida: “Barcha eshitib olsin: issiqxonalar bu – oziq-ovqat xavfsizligi, iqtisodiy xavfsizlik masalasi hisoblanadi”, — deb alohida ta’kidladi va tegishli idoralarga sohada qat’iy nazorat o‘rnatish topshirildi.
Yangi islohotlar va imkoniyatlar issiqxona biznesi uchun mustahkam poydevor yaratadi, ishbilarmonlarning ishonchi va faoliyatini yanada rag‘batlantiradi. Yurtimizdagi har bir tadbirkor, fermer va ishchi uchun bu yangiliklar katta imkoniyat va yangi bosqichni boshlab berishi aniq.
“Zamin”ni Telegramʻda oʻqing!
