Hozirgi kunga kelib, dunyoning eng top oliygohlarida ikki mingdan ziyod o‘zbekistonlik yoshlar tahsil olayotgani ma’lum bo‘ldi. Bu haqda O‘zbekiston mustaqilligining 34 yilligiga bag‘ishlangan marosimda davlat rahbari Shavkat Mirziyoyev xabar berdi.
Prezident matbuot xizmati xabariga ko‘ra, shularning 750 nafari “El-yurt umidi” jamg‘armasi orqali davlat hisobidan moliyaviy qo‘llab-quvvatlanib, xorijdagi nufuzli universitetlarda ta’lim olish imkoniga ega bo‘lmoqda.
Shavkat Mirziyoyev qayd etganidek, “O‘tgan yili yurtimiz yoshlari top-500 talik oliygohlarga kirish bo‘yicha Markaziy Osiyoda birinchi o‘rinni egallagani barchamizni chin dildan xursand qildi. Ayniqsa, farzandlari dunyodagi eng nufuzli universitetlarda tahsil olayotgan ota-onalarning quvonchini so‘z bilan bayon etish qiyin”, degan fikrni bildirdi davlat rahbari.
Hisob-kitoblar va tahlillarga ko‘ra, Shavkat Mirziyoyev prezidentlikka ilk marotaba saylanganidan buyon o‘tgan sakkiz yilda respublikada oliy ta’limdagi qamrov 9 foizdan 42 foizga yetkazildi. Shu davrda maktabgacha ta’lim muassasalaridagi o‘rinlar 2,5 millionga oshirildi va qamrov 78 foizga ko‘tarildi. Yangi maktablar qurilishi va mavjudlari kengaytirilishi hisobiga qo‘shimcha 1 million o‘quvchi uchun imkoniyat yaratildi.
Ma’lumot uchun, “El-yurt umidi” fondi 2018-yil sentyabrdagi prezident farmoni asosida tuzilgan. Ushbu tashkilot o‘zbekistonlik yoshlarni xorijdagi eng nufuzli ta’lim va ilmiy muassasalarda bakalavriat, magistratura va doktorantura dasturlari bo‘yicha ta’lim olishlarini moliyaviy jihatdan qo‘llab-quvvatlaydi. Shu bilan birga, fond chet elda ta’lim olgan mutaxassislarni mamlakatda munosib ishga joylashishiga ko‘maklashish vazifasini ham bajaradi.
Fondning asosiy vazifalaridan biri — kadrlarning mehnat faoliyatini monitoring qilish, kasbiy rivojlanishi va mansab yo‘lidagi qadamlarini qo‘llab-quvvatlashdir. Bu esa o‘z navbatida mamlakatning intellektual salohiyatini oshirishga va rivojlanishni tezlashtirishga xizmat qiladi.
“El-yurt umidi” fondi uchun 2025-yilda davlat budjetiga 600 milliard so‘m ajratilgan. Bu miqdor 2026-yilda 800 milliard so‘mga, 2027-yilda 950 milliard so‘mga, 2028-yilda esa 1 trillion so‘mgacha oshirilishi rejalashtirilgan. Bu mablag‘lar yoshlar uchun qo‘llab-quvvatlash imkoniyatlarini kengaytirib, ularning dunyoning eng nufuzli oliygohlarida ta’lim olishiga katta turtki bo‘ladi.
