Namangan viloyatiga Mo‘g‘uliston Respublikasidan 730 bosh “Bayat” naslli qo‘ylar olib kelindi. Bu zot yog‘li-qo‘ylar turiga mansub bo‘lib, qattiq iqlim va qiyin tabiiy sharoitlarga moslashish qobiliyati bilan ajralib turadi.
Ma’lum qilinishicha, “Bayat” zotining urg‘ochi qo‘ylari 35–40 kilogramm, qo‘chqorlari esa 45–50 kilogrammgacha vaznga ega. Bu hayvonlar yuqori go‘sht va yog‘ mahsuldorligiga ega bo‘lib, iqtisodiy samaradorligi bilan chorvachilikda muhim ahamiyat kasb etadi.
Hozircha dastlabki bosqichda olib kelingan 730 bosh qo‘y Namangan viloyatining Uychi tumanida joylashgan “Axsi chorva” MCHJga yetkazildi. Kelgusida ularning mahalliy sharoitga moslashuvi, parvarishi va ko‘paytirish imkoniyatlari to‘liq o‘rganilishi rejalashtirilgan.
Umumiy loyiha doirasida Mo‘g‘ulistondan 100 ming bosh naslli qo‘y import qilinishi rejalashtirilmoqda. Mutaxassislar ta’kidlashicha, bu tashabbus chorvachilik sohasida yangi import-iqlimiy texnologiya va innovatsiya sifatida ahamiyatli bo‘lib, mahalliy iqtisodiyotni rivojlantirishda katta hissa qo‘shishi kutilayotgan tashabbusdir.
Shu tariqa, “Bayat” qo‘ylari nafaqat chorvachilikda mahsuldorlikni oshiradi, balki Namangan aholisi uchun yangi iqtisodiy imkoniyatlar va ish o‘rinlari yaratishda ham ahamiyatli rol o‘ynaydi.
“Zamin”ni Telegramʻda oʻqing!
