O‘zbekistonda aholini so‘nggi bor umumiy ro‘yxatga olish 1989-yilda amalga oshirilgan edi. Endi esa mazkur keng qamrovli tadbir 2026-yilning 15-yanvaridan 28-fevralgacha tashkil etilishi rejalashtirilgan. Ro‘yxatga olish jarayoni dastlabki 17 kun davomida internet orqali onlayn tarzda o‘tkaziladi, keyin esa bir oy mobaynida mahalla yettiligi ishtirokida uyma-uy yurib amalga oshiriladi.
Bu muhim tashabbus orqali davlat xarajatlari 1,3 trillion so‘mga qisqartirilishi va ro‘yxatga olish jarayonining sodda, tez hamda shaffof bo‘lishi alohida ta’kidlanmoqda. Savollar soni ham avvalgi 328 tadan 71 taga kamaytirildi, bu esa jarayonni yanada qulay va samarali qiladi.
Ro‘yxatga olishda Yevropa statistika konferensiyasi tavsiyalari asosida aholining tarkibi, migratsiya holati, oilaviy vaziyati va daromad manbalari bo‘yicha yagona ma’lumotlar bazasi yaratiladi. Shu tariqa, davlat aholining ijtimoiy va iqtisodiy holati haqida to‘liq va ishonchli ma’lumotga ega bo‘ladi.
Shuningdek, qishloq xo‘jaligi sohasi bo‘yicha ham aniq statistika yig‘iladi. Yer maydonlaridan foydalanish, chorva va parranda soni hisobga olinadi. Bu ma’lumotlar orqali qishloq xo‘jaligiga yo‘naltirilayotgan mablag‘lar samaradorligi oshiriladi va mamlakatda oziq-ovqat xavfsizligi ta’minlanadi.
Ro‘yxatga olishni samarali tashkil etish maqsadida mahalla yettiligi xodimlari maxsus o‘quv dasturi asosida tayyorlanadi va qo‘llab-quvvatlanadi. Shu bilan birga, keng targ‘ibot ishlari ommaviy axborot vositalari va ijtimoiy tarmoqlar orqali faol olib boriladi.
Mazkur tadbirlar aholi haqidagi demografik va iqtisodiy ma’lumotlarni aniq bazada yig‘ish orqali davlatning strategik siyosatini samarali amalga oshirishga xizmat qiladi va aholi turmush tarzini yaxshilashda muhim rol o‘ynaydi.
“Zamin”ni Telegramʻda oʻqing!
