O‘zbekistonda bu yil yangi tug‘ilgan chaqaloqlar soni ortib, ular orasida o‘g‘il bolalar soni qizlarga nisbatan sezilarli ko‘p ekani ma’lum bo‘ldi. Milliy statistika qo‘mitasi e’lon qilgan rasmiy ma’lumotlarga ko‘ra, 2025-yilning yanvar–sentyabr oylari mobaynida mamlakat bo‘ylab 665 mingga yaqin yangi tug‘ilgan chaqaloqlar Fuqarolik holati organlarida ro‘yxatga olingan.
Ma’lumotda qayd etilishicha, ularning 343,6 ming nafari yoki 51,7 foizi o‘g‘il bolalar, 321 ming nafari esa 48,3 foizini tashkil etuvchi qizlardir. Bu ko‘rsatkich o‘g‘il bolalar soni qizlarga nisbatan taxminan 20 ming nafarga ko‘p ekanini anglatadi.
Tug‘ilishlar geografik jihatdan ham muayyan farq bilan ajralib turdi. Respublika shaharlarida 319,3 ming chaqaloq dunyoga kelgan bo‘lsa, qishloq joylarda bu raqam 345,3 ming nafarni tashkil etgan. Ya’ni, umumiy tug‘ilishlar sonining 52 foizi qishloqlarda, 48 foizi esa shaharlarda qayd etilgan.
Statistik ma’lumotlar mamlakatda demografik o‘sish barqarorligini ko‘rsatmoqda. Mutaxassislar fikricha, aholining tabiiy o‘sish sur’ati ijobiy yo‘nalishda bo‘lib, bu ijtimoiy rivojlanish va sog‘lom avlod tug‘ilishi uchun qulay muhit mavjudligidan dalolat beradi.
Demografik ko‘rsatkichlar mamlakatning iqtisodiy, sog‘liqni saqlash va ta’lim sohalaridagi barqaror rivojlanish bilan chambarchas bog‘liq. Yangi tug‘ilgan bolalar sonining ortishi kelgusida mehnat bozori, ta’lim tizimi va ijtimoiy infratuzilmadagi ehtiyojlarni rejalashtirishda muhim ahamiyat kasb etadi.
Shuningdek, ekspertlar ta’kidlamoqdaki, aholi o‘sishining tabiiy balansi saqlanib qolishi mamlakatning barqaror demografik siyosatini namoyon etadi. Bu esa har bir yangi tug‘ilgan chaqaloq kelajakdagi yurt ravnaqi va inson kapitali rivojining muhim bo‘g‘ini ekanini yana bir bor ko‘rsatmoqda.
“Zamin”ni Telegramʻda oʻqing!
