YuNESKOning 43-sessiyasi doirasida o‘tkazilgan xalqaro anjumanda Samarqand shahri tarixi yangidan baholandi. Ilmiy tadqiqotlar va arxeologik topilmalar asosida shahar tarixi ilgari aytilganidek 2750 yil emas, balki 3000 yildan ham ko‘p ekani aniqlandi.
Olimlar fikricha, Samarqand hududida ilk shahar madaniyati miloddan avvalgi birinchi ming yillik boshlarida shakllangan. Topilgan qadimiy buyumlar va yozma manbalar bu hudud o‘sha davrdayoq O‘rta Osiyoning eng muhim madaniy markazlaridan biri bo‘lganini ko‘rsatmoqda.
Mutaxassislar Samarqandning butun insoniyat tarixi uchun katta ahamiyatga ega ekanini ta’kidlashdi. YuNESKO vakillari bu natija shahar madaniy merosini asrash va yanada chuqur o‘rganish ishlariga turtki bo‘lishini qayd etdi.
Anjumanda shuningdek, Samarqandning tarixiy yodgorliklarini saqlash, yangi arxeologik izlanishlarni davom ettirish va shahar qadimiy qiyofasini kelajak avlodlarga yetkazish muhimligi ta’kidlandi.
“Zamin”ni Telegramʻda oʻqing!
