Nukus shahrida xalqaro mezonlar asosida barpo etilgan zamonaviy Karakalpak Palace Hotel mehmonxonasi o‘z eshiklarini ochdi va bu haqdagi xabar Prezident administratsiyasi rahbari Saida Mirziyoyevaning Telegram orqali bergan bayonotida aks etdi. Uning ta’kidlashicha, mazkur majmua hudud tadbirkorlariga taqdim etilgan imkoniyat va qo‘llovlar samarasida hayotga tatbiq etilgan yirik loyihalardan biri hisoblanadi.
Saida Mirziyoyeva Nukusga tashrifi chog‘ida mehmonxona faoliyati bilan yaqindan tanishib, yangi inshootni nafaqat sayyohlar, balki investorlar uchun ham muhim infratuzilmaviy loyiha deya ta’rifladi. Chunki Qoraqalpog‘iston hududi O‘zbekistondagi eng o‘ziga xos va mashhur sayyohlik manzillaridan biri sifatida tobora katta qiziqish uyg‘otmoqda.
Postda ta’kidlanishicha, mintaqada sayyohlar oqimini ko‘paytirish, mutaxassislar va sarmoyadorlar uchun qulay sharoit yaratish, zamonaviy xizmatlar tarmog‘ini kengaytirish bugun asosiy vazifalardan biriga aylangan. Yangi Karakalpak Palace Hotel esa aynan shu maqsadga xizmat qiluvchi, hududning turistik qiyofasini yanada ochib beradigan muhim inshoot sifatida baholanmoqda.
Mazkur mehmonxona ochilishi Nukusning jozibadorligini oshirib, Qoraqalpog‘istonning turizm salohiyati va tadbirkorlik muhitini kuchaytirishga qo‘shimcha turtki beradi. Mirziyoyeva ta’kidlaganidek, bunday infratuzilmaviy loyihalar hudud rivojiga xizmat qiluvchi strategik qadamlardir.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
