Prezidentning "Ichki ishlar organlarining qo‘riqlash sohasidagi faoliyatini samarali tashkil etish chora-tadbirlari to‘g‘risida"gi qarori qabul qilindi. Ushbu hujjat bilan Milliy gvardiyaning Qo‘riqlash bosh boshqarmasi Ichki ishlar vazirligi (IIV) huzuridagi Qo‘riqlash departamenti etib qayta tashkil etildi. Yangi tuzilma obyektlarni zamonaviy usullarda qo‘riqlash, sun’iy intellekt texnologiyalarini joriy etish orqali mamlakat xavfsizligini mustahkamlashni ko‘zda tutadi.
Sun’iy idrok va raqamli nazorat
Departament zimmasiga shartnoma asosida davlat ahamiyatiga molik, o‘ta muhim obyektlarni, ta’lim dargohlarini, shuningdek, jismoniy va yuridik shaxslarning mol-mulkini zamonaviy usullar orqali qo‘riqlash vazifasi yuklatildi. Asosiy e’tibor qo‘riqlashga raqamli vositalar va sun’iy idrok texnologiyalarini keng jalb qilish, qo‘riqlanayotgan obyektlarda ichki tartib va nazorat rejimlari ni kuchaytirishga qaratiladi.
2026 yildan majburiy "Face ID"
Qarorda alohida qayd etilishicha, 2026 yil 1 yanvardan e’tiboran qo‘riqlovga olingan banklar, yirik korxonalar va mahalliy hokimiyat binolarida kirish va chiqish joylariga shaxsni aniqlovchi, ya’ni yuzni tanish tizimlari bosqichma-bosqich o‘rnatiladi. Bu choralar qo‘riqlash xizmatlari samaradorligini va xavfsizlik darajasini oshirishga qaratilgan bo‘lib, nazoratni zamonaviy raqamli texnologiyalar asosida mustahkamlaydi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
