Toshkentda transport tizimini tubdan yangilaydigan, zamonaviy texnologiyalar asosida ishlaydigan yo‘l harakatini boshqarish markazi tashkil etildi. Prezident qaroriga binoan faoliyati boshlangan ushbu markaz poytaxtning intellektual transport tizimiga asosiy operator vazifasini bajaradi. Maqsad — 2027-yil 1-fevralgacha trafik boshqaruvini to‘liq raqamlashtirish va shahar infratuzilmasini global darajada modernizatsiya qilish.
Eng muhim yangiliklardan biri — ekologik stiker rangiga mos kelmaydigan avtomobilarning belgilangan zonalarga kirishi avtomatik ravishda cheklanadi. Bu nafaqat ekologik holatni yaxshilaydi, balki shahar markazidagi tirbandliklarning oldini olishda ham katta ahamiyatga ega bo‘ladi.
Yangi markaz quyidagi yo‘nalishlarda ish olib boradi:
- shahar bo‘ylab transport, yo‘lovchi va piyodalar harakatini doimiy monitoring qilish;
- ilg‘or xalqaro tajriba asosida yo‘l-transport infratuzilmasini rivojlantirish bo‘yicha hujjatlar tayyorlash;
- Toshkentning to‘liq transport ma’lumotlar bazasini va master-rejasini shakllantirish;
- barcha yo‘l va transport sohalaridagi tashkilotlar faoliyatini muvofiqlashtirish;
- jamoat transportini jozibador qilish, shaxsiy avtoqo‘llanishni kamaytirish va ekologik muhitni yaxshilash;
- yer usti metro, yo‘l o‘tkazgichlari va asosiy kesishmalarda ko‘p qavatli avtoturargohlar tashkil etish;
- qoidalarga rioya qilish, yo‘l madaniyatini oshirish va xavfsizlikni targ‘ib qilish.
Bundan tashqari, 2028-yil oxirigacha vazirlik va idoralarning bir qator vakolatlari huquqiy eksperiment sifatida ushbu markazga vaqtincha o‘tkaziladi.
Intellektual transport tizimi esa zamonaviy texnologiyalarni o‘z ichiga oladi. Yangi tarmoq videokuzatuv kameralari, sensorlar va avtomatlashtirilgan svetofor boshqaruvi orqali real vaqtda harakatni tahlil qiladi. Agar maxsus xizmatlar — tez yordam, yong‘in xavfsizligi, YPX — harakat jadvalidan chetga chiqsa, ular uchun ustuvorlik beriladi.
Avtotransport vositalari harakati, yuk tashish qoidalari, og‘irlik va hajm me’yorlari doimiy nazoratda bo‘ladi. Bundan tashqari, tizim Ekologiya qo‘mitasining Situatsion markaziga ulanadi va ekologik toifasiga mos kelmaydigan mashinalar avtomatik tarzda aniqlanadi.
Shu bilan birga, jarohatlar va YTH xavfi yuqori bo‘lgan nuqtalar aniqlanib, ularni kamaytirish bo‘yicha amaliy tavsiyalar ishlab chiqiladi. Toshkent transport tizimini 2030-yilgacha rivojlantirish bo‘yicha maqsadli ko‘rsatkichlar ham tasdiqlangan.
Bu islohotlar nafaqat tirbandliklarni kamaytiradi, balki poytaxtni yanada qulay, xavfsiz va ekologik barqaror shaharga aylantirishni maqsad qiladi. Mazkur tizim barcha yo‘l harakati ishtirokchilari uchun yangi, zamonaviy va qulay bosqichni boshlab beradi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
