O‘zbekiston Respublikasi Prezident Administratsiyasi rahbari Saida Mirziyoyeva Xitoy Xalqaro kommunikatsiya markazi raisi Long Yuysyan bilan muhim uchrashuv o‘tkazdi. Muloqot chog‘ida ikki davlat o‘rtasidagi keng qamrovli hamkorlikni yanada yuqori bosqichga olib chiqish masalalari atroflicha ko‘rib chiqildi.
Tomonlar O‘zbekiston va Xitoy o‘rtasidagi har tomonlama strategik sheriklik yil sayin izchil rivojlanayotganini ta’kidlab, uni yanada chuqurlashtirish uchun yangi tashabbuslar va ustuvor yo‘nalishlarni muhokama qilishdi. Ayniqsa, iqtisodiy hamkorlik, kommunikatsiya, innovatsion loyihalar va qo‘shma platformalarni rivojlantirish bo‘yicha samarali takliflar almashildi.
Saida Mirziyoyeva uchrashuv haqidagi fikrlarini o‘zining telegram-kanalida bayon etar ekan, Xitoy Xalqaro kommunikatsiya markazining ikki davlat aloqalarini mustahkamlashda, yangilanish va islohotlarga xizmat qiladigan qo‘shma loyihalarni ilgari surishda muhim o‘rin tutayotganini alohida ta’kidladi.
Uning ta’kidlashicha, ta’lim, fan, madaniyat va turizm sohalaridagi almashinuvlar ikki davlat xalqlari o‘rtasidagi do‘stlik va o‘zaro anglashuvni kuchaytirishda katta ahamiyatga ega. Shu yo‘nalishlarda qo‘shma dasturlar, madaniy tadbirlar va o‘quv platformalarini kengaytirish masalalariga ham jiddiy e’tibor qaratildi.
O‘zbekiston va Xitoy o‘rtasidagi munosabatlar so‘nggi yillarda izchil sur’at bilan rivojlanib, strategik sheriklikning yangi bosqichiga ko‘tarilmoqda. Bu uchrashuv esa ikki davlat o‘rtasidagi muloqot va ishonch mustahkamlanib borayotganini yana bir bor namoyon qildi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
