2026 yil 1 yanvardan boshlab O‘zbekistonda tadbirkorlik faoliyatini boshlash yanada soddalashadi. Yangi tartibga ko‘ra, biznes subyektlarini davlat ro‘yxatidan o‘tkazishda «Biznesni 15 daqiqada boshlash» tamoyili amalga oshiriladi. Bu yangilik tadbirkorlar uchun vaqt va resurslarni tejashga qaratilgan muhim qadam sifatida baholanmoqda.
Yangi tizimning eng asosiy jihati — xizmatlarni kompozit, ya’ni bir vaqtning o‘zida taqdim etish imkoniyatidir. Endi tadbirkor davlat ro‘yxatidan o‘tish jarayonida bir necha alohida bosqichlardan o‘tishga majbur bo‘lmaydi, aksincha, zarur xizmatlarni yagona jarayon doirasida oladi.
Qonunchilikka muvofiq, 2026 yildan e’tiboran tadbirkorni ro‘yxatdan o‘tkazish paytida quyidagi xizmatlar parallel ravishda taqdim etiladi: elektron raqamli imzo kalitini olish, bank hisobvaraqlarini ochish va faollashtirish uchun ariza yuborish, ayrim faoliyat turlari bo‘yicha litsenziya yoki ruxsatnoma uchun murojaat qilish, ko‘chmas mulk ijara shartnomasini rasmiylashtirish, QQS to‘lovchisi sifatida ro‘yxatdan o‘tish, onlayn nazorat-kassa mashinalarini xarid qilish va soliq organlarida hisobga qo‘yish, shuningdek, yuridik shaxs rahbarini tayinlab, uni “Yagona milliy mehnat tizimi”da ro‘yxatga olish.
Muhimi, tadbirkor ushbu xizmatlarning barchasidan majburiy ravishda foydalanishi shart emas. Har bir xizmat ixtiyoriy bo‘lib, faqat tanlangan xizmatlar uchun to‘lov amalga oshiriladi. Yana bir qulay jihati — barcha to‘lovlar yagona QR-kod orqali bajarilishi mumkin bo‘ladi.
Mutaxassislar fikricha, ushbu yangilik biznes muhitini yanada yaxshilash, yangi tadbirkorlarni rag‘batlantirish va “soatlab navbat kutish” davriga barham berishga xizmat qiladi. Qisqasi, yangi tizim tadbirkorlikka kirishni tez, qulay va zamonaviy qiladi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
