“O‘zbekiston – 2030” strategiyasi loyihasida aholi salomatligini yaxshilash orqali o‘rtacha umr ko‘rish davomiyligini 78 yoshgacha oshirish sog‘liqni saqlash sohasidagi eng muhim vazifalardan biri sifatida belgilangan. Ushbu maqsadga erishish uchun tibbiy xizmatlar sifatini bosqichma-bosqich yaxshilash, profilaktika ishlarini kuchaytirish hamda kasalliklarni erta aniqlash va samarali davolash mexanizmlarini kengaytirish rejalashtirilgan.
Strategiya loyihasiga ko‘ra, sog‘liqni saqlash tizimini moliyalashtirish barqaror ravishda oshiriladi. Xususan, 2030 yilga qadar davlat byudjetidan tibbiyot sohasiga ajratiladigan mablag‘lar ulushini yalpi ichki mahsulotning 5 foiziga yetkazish ko‘zda tutilmoqda. Bu esa aholi uchun tibbiy xizmatlardan foydalanish imkoniyatlarini kengaytirish va sohaning moddiy-texnika bazasini mustahkamlashga xizmat qilishi kutilmoqda.
Erta o‘lim holatlarini qisqartirish ham strategiyaning ustuvor yo‘nalishlaridan biri hisoblanadi. Jumladan, 30–69 yoshdagi aholi orasida yurak-qon tomir kasalliklaridan kelib chiqadigan erta o‘limni 27 foizgacha, saraton kasalligi bilan bog‘liq erta o‘limni esa 5,2 foizgacha kamaytirish maqsad qilingan.
Shuningdek, qandli diabet bilan kasallangan bemorlarni davolashda to‘liq qamrovni ta’minlash, nafas yo‘llari kasalliklaridan erta o‘lim ko‘rsatkichini 30–69 yosh toifasida 1,5 foizdan oshirmaslik vazifasi ham belgilangan. Sil kasalligi bo‘yicha esa kasallanish darajasini 33 foizdan yuqori bo‘lmasligini ta’minlash rejalashtirilmoqda.
Qayd etilishicha, mazkur chora-tadbirlar aholi salomatligini mustahkamlash, kasalliklar xavfini kamaytirish va hayot sifatini yaxshilash orqali umr davomiyligini oshirishga qaratilgan. Ma’lumot uchun, 2024 yilda O‘zbekistonda doimiy aholining o‘rtacha umr ko‘rish davomiyligi 75,1 yoshni tashkil etgan.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
