O'zbekistonda transport infratuzilmasini boshqarish tizimida muhim o'zgarishlar bo'ldi. Prezident Shavkat Mirziyoyev imzolagan yangi qonun bilan yo'l-transport tarmog'ining ayrim bo'g'inlarini boshqarish va rivojlantirish vakolatlari mahalliy hokimiyatlarga o'tkazildi. Bu haqda upl.uz xabar beradi.
Hujjatga ko'ra, endi bekat majmualari qayerga o'rnatilishini aynan hokimiyatlar belgilaydi. Shuningdek, bekatlarning obodonchiligi, ularning holatini saqlash va jamoat transporti harakatini muvofiqlashtiruvchi dispetcherlik punktlari faoliyati ham bevosita mahalliy rahbarlar mas'uliyatiga kiritildi.
Qonun joylardagi ijro hokimiyati zimmasidagi vazifalarni sezilarli kengaytirdi. Endi hokimiyatlar nafaqat bekat qurilishi va tashqi ko'rinishiga mas'ul, balki aholiga transport xizmati ko'rsatish bo'yicha tashuvchilar bilan shartnomalar tuzishi ham shart.
Bundan tashqari, yo'l harakatini tashkil etish bo'yicha rejalarni ishlab chiqish va amaliyotga joriy etish ham rasman hokimiyatlar vakolatiga kiritildi. Bu esa hududlarda transport oqimini chuqur tahlil qilish va aniq yechimlar ishlab chiqishni talab qiladi.
Islohotning yana bir muhim jihati — hududiy transportni rivojlantirish bo'yicha uzoq muddatli strategiyalarni tasdiqlash huquqi mahalliy boshqaruvga berildi. Qonun hokimiyatlardan belgilangan ko'rsatkichlar bajarilishini qat'iy monitoring qilishni ham talab etadi.
Shu bilan birga, mahalliy ijro tuzilmalari yong'in xavfsizligi uchun moliyaviy xarajatlarni kelishish vakolatiga ham ega bo'ldi. Gap, xususan, yong'in xizmatlarining moddiy-texnik ta'minoti va operatsion faoliyatini moliyalashtirish masalalari haqida ketmoqda.
Qonun rasmiy OAVda e'lon qilingan zahoti kuchga kiradi. Mutasaddilar fikricha, vakolatlarning joylarga o'tkazilishi aholining murojaatlariga tezroq javob qaytarish va shahar infratuzilmasi sifatini hududiy nazorat orqali yaxshilashga xizmat qiladi.
Agar yo'l harakati bo'yicha rejalarni amalga oshirish jarayonida bahsli vaziyatlar yuzaga kelsa, xavfsizlikni ta'minlash va belgilangan me'yorlarga rioya etilishini kuzatish uchun huquq-tartibot xodimlari ham jalb qilinishi mumkin.
So'nggi yillarda Toshkent va boshqa yirik shaharlarda "aqlli" bekatlar ham faol o'rnatilmoqda. Ular konditsioner orqali issiqdan himoya qiladi, telefonlarni quvvatlash imkonini beradi va avtobus kutayotgan paytda bepul Wi-Fi xizmatini taqdim etadi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
