O‘zbekiston aeroportlarida uch oyda yo‘lovchilar soni keskin oshdi
"Uzbekistan Airports" kompaniyasi 2026-yilning birinchi choragida yo‘lovchi oqimi va parvozlar soni bo‘yicha sezilarli o‘sish qayd etilganini ma’lum qildi. Hisobot davrida qariyb 4 million yo‘lovchiga xizmat ko‘rsatilib, bu ko‘rsatkich o‘tgan yilning mos davriga nisbatan 19 foizga oshgan. Toshkent xalqaro aeroporti yetakchilikni saqlab qolgan bo‘lsa, hududiy markazlar orasida Samarqand aeroporti eng yuqori faollikni ko‘rsatdi. Shuningdek, yuk tashish hajmi 14 foizga ortib, sohadagi ijobiy dinamika xalqaro yo‘nalishlarning kengayishi va yangi qatnovlarning yo‘lga qo‘yilishi bilan izohlanmoqda.
“Uzbekistan Airports” kompaniyasi 2026 yilning yanvar–mart oylariga oid faoliyat natijalarini e’lon qildi. Hisobotga ko‘ra, mamlakat aeroportlarida yo‘lovchi oqimi, parvozlar soni hamda yuk tashish hajmi bo‘yicha sezilarli o‘sish qayd etilgan.
Joriy yilning dastlabki uch oyida respublika aeroportlari orqali jami 30 859 ta reys amalga oshirilgan bo‘lib, bu o‘tgan yilning mos davriga nisbatan qariyb 10 foizga ko‘pdir. Ushbu parvozlarning asosiy qismi — 22 885 tasi xalqaro yo‘nalishlarga to‘g‘ri kelgan bo‘lsa, 7 974 tasi ichki qatnovlar hissasiga to‘g‘ri keladi.
Yo‘lovchilar soni ham sezilarli darajada oshgan. Hisobot davrida aeroportlar orqali jami 3 million 987 mingdan ortiq yo‘lovchi qatnovi amalga oshirilgan. Ularning 3,32 million nafari xalqaro yo‘nalishlarda, 663,5 ming nafari esa mamlakat ichida safar qilgan. Bu esa 2025 yilning birinchi choragiga nisbatan qariyb 19 foizlik o‘sishni anglatadi.
An’anaviy ravishda mamlakatning eng yirik aviatsiya markazi hisoblangan Toshkent xalqaro aeroporti yetakchilikni saqlab qolmoqda. Ushbu aeroport orqali uch oy davomida 2,56 million yo‘lovchiga xizmat ko‘rsatilgan hamda qariyb 19 mingta reys amalga oshirilgan.
Hududiy aeroportlar orasida ham faollik yuqori bo‘ldi. Xususan, Samarqand aeroporti 376,4 ming yo‘lovchi bilan yetakchi hududiy markazga aylandi. Undan keyingi o‘rinlarda Urganch (222 ming), Namangan (210,1 ming) va Farg‘ona (161,2 ming) aeroportlari qayd etildi.
Yuk tashish ko‘rsatkichlari ham ijobiy dinamikani namoyish etdi. Birinchi chorak davomida aeroportlar orqali 19 783 tonna yuk va pochta jo‘natmalari tashilgan bo‘lib, bu o‘tgan yilga nisbatan 14 foizga oshganini ko‘rsatadi.
Mutaxassislar fikricha, bu kabi o‘sish sur’atlari mamlakat aviatsiya sohasining izchil rivojlanayotganidan dalolat beradi. Xalqaro reyslar geografiyasining kengayishi, yangi yo‘nalishlarning ochilishi hamda ichki qatnovlarga bo‘lgan talabning ortishi ushbu natijalarga asosiy omil bo‘lmoqda.
Izohlar 0
…