Foto: Prezident matbuot xizmati
23 aprel kuni Oʻzbekiston Respublikasi Prezidenti Shavkat Mirziyoyev Toshkent shahrining Mirzo Ulugʻbek tumanida joylashgan Bogʻimaydon mahallasida amalga oshirilgan keng koʻlamli bunyodkorlik ishlari bilan yaqindan tanishdi. Mazkur tashrif mahallalarni kompleks rivojlantirish va aholi uchun munosib turmush sharoitlarini yaratish borasidagi islohotlarning amaldagi natijalarini koʻrsatdi.
1987 yilda tashkil etilgan ushbu mahallada bugungi kunda 41 ta koʻp qavatli uy va 1 ming 990 ta xonadon mavjud boʻlib, qariyb 5,5 ming nafar aholi yashab kelmoqda. Soʻnggi yillarda hududda amalga oshirilgan obodonlashtirish va modernizatsiya ishlari natijasida mahalla zamonaviy va qulay yashash maskaniga aylangan.
Xususan, aholi, ayniqsa yoshlar va bolalar uchun keng imkoniyatlar yaratilgan. Hududda 20 ta bolalar oʻyin maydonchasi, 11 ta vorkaut zonasi, 3 ta mini-futbol maydoni hamda tennis korti barpo etilgan. Shuningdek, ikki nafar maktabgacha taʼlim muassasasi qariyb 500 nafar bolani qamrab olgani mahallada taʼlim va tarbiyaga ham katta eʼtibor qaratilayotganini koʻrsatadi.
Mahallada iqtisodiy faollikni kuchaytirish va aholi bandligini taʼminlash masalasi ham eʼtibor markazida. Bugungi kunda bu yerda 70 dan ortiq tadbirkorlik subyektlari faoliyat yuritmoqda. Yoshlar bandligi masalasida ham ijobiy natijalar kuzatilmoqda — 1 048 nafar yoshdan 949 nafari ish bilan taʼminlangani bu boradagi samarali ishlardan dalolat beradi.
Hududda 2022 yilda tashkil etilgan ekobogʻ ham aholining dam olishi va tabiat bagʻrida vaqt oʻtkazishi uchun qulay maskanga aylangan. Shuningdek, “Nuroniylar maskani” faoliyati mahalla hayotida katta ahamiyat kasb etib, katta avlod vakillarining faol ishtirokini taʼminlamoqda.
Prezidentga mahallada xavfsizlikni taʼminlash boʻyicha joriy etilgan zamonaviy yechimlar ham taqdim etildi. Xususan, turar joylar kirish qismlari videokuzatuv tizimlari va qoʻriqlash pultlari bilan jihozlangan. Kirib-chiqish harakatlari va avtotransport vositalari zamonaviy raqamli texnologiyalar orqali doimiy nazorat qilib borilmoqda. Bu esa aholi tinchligi va xavfsizligini yanada mustahkamlashga xizmat qilmoqda.
Davlat rahbari mahalla ahli uchun yaratilgan sharoitlarni koʻzdan kechirar ekan, mahalla faollari va oqsoqollari bilan samimiy muloqot qildi. U obod va fayzli mahalla jamiyatning mustahkam tayanchi ekanini taʼkidlab, tinchlik, hamjihatlik va ijtimoiy birdamlikni saqlash har doim ustuvor vazifa boʻlib qolishini alohida qayd etdi.
Tashrif davomida Prezident mahallada oʻtkazilayotgan sumalak saylida ham ishtirok etdi. Bu yerda u mahalla ahli, ayniqsa yoshlar va bolalar bilan samimiy suhbat qurib, milliy qadriyatlarni asrash va avlodlar oʻrtasidagi bogʻliqlikni mustahkamlash muhimligini taʼkidladi.
Shuningdek, sport maydonchasida mashgʻulot olib borayotgan yoshlar bilan uchrashuvda jismoniy tarbiya va sogʻlom turmush tarzining inson kamolotidagi oʻrni alohida eʼtirof etildi. Prezident yoshlarni faollikka, sport bilan shugʻullanishga va sogʻlom hayot tarzini tanlashga chaqirdi.
Umuman olganda, Bogʻimaydon mahallasi misolida amalga oshirilayotgan ishlar shahar muhitini yaxshilash, aholi farovonligini oshirish va zamonaviy yashash standartlarini shakllantirish borasidagi islohotlarning samarasini yaqqol namoyon etmoqda.
