Oʻzbekistonda madaniyat va sanʼat sohasini yangi bosqichga olib chiqishga qaratilgan muhim tashabbuslar amalga oshirilmoqda. 2026 yil 1 iyuldan boshlab Qoraqalpogʻiston Respublikasi, barcha viloyatlar hamda Toshkent shahrida tajriba tariqasida har bir hududda bittadan “Madaniyat mehmonxonasi” madaniy klasterini barpo etish rejalashtirilgan.
Ushbu innovatsion loyihalarning asosiy maqsadi — hududlarda madaniy hayotni faollashtirish, ijodkorlarni qoʻllab-quvvatlash va aholi uchun madaniy xizmatlar doirasini kengaytirishdan iborat. “Madaniyat mehmonxonasi” formatdagi klasterlar orqali sanʼat, ijod, taʼlim va turli madaniy tadbirlar uchun zamonaviy va qulay infratuzilma yaratilishi kutilmoqda. Bu esa oʻz navbatida yangi isteʼdodlarni kashf etish va ularni rivojlantirishga xizmat qiladi.
Shu bilan birga, taʼlim tizimida ham sezilarli yangilanishlar joriy etilmoqda. 2026–2027 oʻquv yilidan boshlab Respublika musiqa va sanʼat texnikumi hamda Respublika estrada va sirk texnikumida mutlaqo yangi kasbiy taʼlim dasturlari asosida oʻqitish yoʻlga qoʻyiladi. Unga koʻra, 2 yillik boshlang‘ich kasbiy taʼlim, 6 oydan 2 yilgacha boʻlgan oʻrta kasbiy taʼlim va kamida 2 yillik oʻrta maxsus kasbiy taʼlim bosqichlari joriy etiladi.
Bundan tashqari, ushbu taʼlim muassasalarida bakalavriat dasturlari bilan uygʻunlashgan “2+2” shaklidagi taʼlim tizimiga ham ruxsat berilishi belgilandi. Bu format talabalarga nazariy bilim bilan birga amaliy koʻnikmalarni ham mustahkam oʻzlashtirish imkonini beradi.
Qaror doirasida Madaniyat vazirligi tizimidagi ixtisoslashtirilgan sanʼat maktablariga qabul tartibi ham aniq belgilab berildi. Endi oʻquvchilar musiqa yoʻnalishiga 5-sinfdan, raqs, teatr, xalq ijodiyoti hamda tasviriy va amaliy sanʼat yoʻnalishlariga esa 9-sinfdan qabul qilinadi.
Ushbu maktablarda maktab-internatlar uchun amal qiluvchi imtiyozlar tatbiq etiladi. Jumladan, taʼlim va yashash xarajatlari davlat budjeti hisobidan qoplanadi, ovqatlanish esa davlat va ota-onalar mablagʻlari asosida moliyalashtiriladi.
Yana bir muhim yangilik — mazkur taʼlim muassasalari bitiruvchilariga bolalar musiqa va sanʼat maktablarida oʻqituvchilik faoliyati bilan shugʻullanish huquqi beriladi. Bu esa sohada kadrlar yetishmovchiligini bartaraf etish va yosh mutaxassislar uchun yangi imkoniyatlar yaratishga xizmat qiladi.
Qisqasi, yangi tashabbuslar nafaqat madaniyat sohasini jonlantiradi, balki ijodiy muhitni kuchaytirib, kelajak avlod uchun keng imkoniyatlar eshigini ochadi.
“Zamin”ni Telegramʻda oʻqing!
