Oʻzbekiston hududi boʻylab yaqinlashib kelayotgan dam olish kunlarida ob-havo sharoiti asosan barqaror va yogʻingarchiliksiz boʻlishi kutilmoqda. “Oʻzgidromet” taqdim etgan maʼlumotlarga koʻra, haftaning ikkinchi yarmida mamlakat aholisini iliq va qulay iqlim kutib turibdi.
Juma kuni kunduzi respublika boʻyicha quruq va nisbatan iliq ob-havo hukm suradi. Havo harorati oʻrtacha +24…+27 daraja atrofida boʻlishi prognoz qilinmoqda. Janubiy hududlar va choʻl mintaqalarida esa harorat yanada koʻtarilib, +29…+32 darajagacha yetishi mumkin. Bu esa bahorning haqiqiy issiq nafasi sezilayotganini anglatadi.
Shanba kuni ob-havo biroz oʻzgarishi mumkin. Xususan, Qoraqalpogʻiston Respublikasining shimoliy qismi va Fargʻona vodiysida ayrim joylarda qisqa muddatli yomgʻir yogʻishi ehtimoli bor. Yakshanba kuni esa Toshkent viloyatining ayrim hududlarida ham shunday yogʻingarchiliklar kuzatilishi mumkin. Baʼzi joylarda momaqaldiroq ham boʻlishi ehtimoldan holi emas.
Harorat koʻrsatkichlari esa ancha yuqori boʻlib qoladi. Shanba kuni kunduzi havo +28…+31 darajagacha isiydi, shimoliy, janubiy va choʻl hududlarda esa +32…+35 darajagacha koʻtarilishi kutilmoqda. Yakshanba kuni ham aksariyat viloyatlarda ana shu darajalar saqlanib qoladi. Faqat Qoraqalpogʻiston va Xorazmda harorat biroz pasayib, +20…+23 darajagacha tushishi mumkin. Shuningdek, Buxoro va Navoiy viloyatlarida ham salqinlashib, +25…+28 daraja atrofida boʻladi.
Shamol masalasiga kelsak, 24–25 aprel kunlari shimoliy va choʻl hududlarda, 26 aprel kuni esa respublika boʻylab ayrim joylarda shamol tezligi 15–20 metr/soniyagacha kuchayishi mumkin. Ayrim hududlarda chang-toʻzonlar kuzatilishi ham ehtimoldan holi emas, shuning uchun ehtiyotkorlikni oshirish tavsiya etiladi.
Poytaxt Toshkent shahrida ham ob-havo asosan qulay boʻladi. Juma va shanba kunlari yogʻingarchilik kutilmaydi, harorat +25…+27 daraja atrofida saqlanadi. Yakshanba kuni esa kunning ikkinchi yarmida qisqa muddatli yomgʻir yogʻishi, momaqaldiroq boʻlishi mumkin. Shu bilan birga shamol tezligi 10–12 metr/soniyagacha kuchayishi kutilmoqda.
Umuman olganda, dam olish kunlari davomida havo harorati +27…+30 daraja atrofida boʻlib, kechalari +14…+17 darajagacha tushadi. Bu esa tabiat qoʻynida hordiq chiqarish, sayr qilish va oila bilan vaqt oʻtkazish uchun ancha qulay sharoit yaratadi.
“Zamin”ni Telegramʻda oʻqing!
