O‘zbekiston doimiy aholisi soni ma’lum qilindi

O‘zbekiston Respublikasi doimiy aholisi soni 2019 yil 1 oktyabr holatiga 33,7 mln kishini tashkil etdi. Davstatqo‘m xabariga ko‘ra, o‘tgan yilga nisbatan o‘sish sur’ati 1,9 foizga teng bo‘ldi.

Respublika hududlari kesimida tahlillar shuni ko‘rsatganki, 2019 yil 1 oktyabr holatiga eng ko‘p aholi soni Samarqand viloyatida respublika aholisi sonidagi ulushi 11,4 %ni tashkil etib, keyingi o‘rinlarda Farg‘ona viloyatida 11,1 %ni, Qashqadaryo viloyatida 9,7 %ni va Andijon viloyatida 9,2 %ni tashkil etgan.

Dastlabki ma’lumotlarga ko‘ra, 2019 yil 1 oktyabr holatiga respublika doimiy aholi sonining 30,5 %i mehnatga layoqatli yoshdan kichiklar, 59,1 %i mehnatga layoqatli yoshdagilar va 10,4 %i mehnatga layoqatli yoshdan kattalar hissasiga to‘g‘ri kelmoqda.

2019 yilning yanvar-sentyabr oylarida aholining tabiiy o‘sishi 477,5 ming kishini tashkil etib, 2018 yil mos davriga nisbatan 36,7 ming kishiga (2018 yilning yanvar-sentyabr oylarida 440,8 ming kishi bo‘lgan) o‘sgan. “Zamin”ni Telegramʻda oʻqing!