"Paxtakor" xarid qilgan chernogoriyalik himoyachi haqida nimalarni bilamiz?

Toshkentning "Paxtakor" klubi ikkinchi davraga qizg‘in tayyorgarlik ko‘rmoqda. Klub bosh murabbiy Slavche Voyneskini iste’foga chiqardi. So‘ngra o‘zbek futboli afsonasi Maksim Shatskixni bosh murabbiy etib tayinladi. Sobiq futbolchi boshchiligida "sherlar" yetakchi futbolchilar bilan shartnomani uzaytirdi. Ketishni istagan yoki ketishi kerak bo‘lgan o‘yinchilar jamoani tark etdi. Shu bilan birga, poytaxt jamoasi yangi futbolchilar transferida ham faollik ko‘rsatmoqda.

Bugun "sherlar" Chernogoriya terma jamoasida 3 o‘yin o‘tkazgan, Yevropaning turli klublarida o‘ynagan Iliya Martinovich transferini e’lon qildi. Xo‘sh, biz u haqda nimalarni bilamiz? Shu fursatdan foydalanib, biz uning faoliyati, qo‘lga kiritgan yutuqlari, umumiy statistikasi kabi jihatlarni siz aziz muxlislar uchun taqdim etishga qaror qildik.

Iliya Martinovich 1994 yil 31 yanvarda Chernogoriyaning Setine shahrida tavallud topgan. Futbolchilik faoliyatini mahalliy "Lovchen" jamoasida boshlagan. 2013 dan 2017 yilga qadar (2013-2014 yillar oralig‘ida "Setine"da ijara asosida o‘ynagan) u shu jamoa a’zosi sifatida to‘p tepgan. 2017 yilda uning "Lovchen" bilan shartnomasi yakuniga yetadi. Shu tariqa, Iliya Sloveniya chempionatiga yo‘l oladi. U erkin agent sifatida "Alyuminiy" klubi bilan shartnoma imzolaydi. U yerda himoyachi 3 mavsum harakat qiladi. Afsuski, o‘tkazilgan 63 bahsda u birorta gol urishga muvaffaq bo‘lmagan. Biroq markaziy himoyachi uchun gol urish juda muhim hisoblanmasligini inobatga olsak, bu fojiaviy natija emas.

2020 yilda u yana erkin agentga aylanadi. Bu safar Sloveniyaning yetakchi jamoalaridan biri "Maribor" qahramonimizni o‘z safiga chorlaydi. Martinovich bu taklifga rozilik bildiradi va "Maribor" futbolchisiga aylanadi. Bu jamoa safida u o‘tgan yili konferensiyalar ligasi saralash bosqichida ishtirok etdi. O‘tkazilgan 3 ta bellashuvda chernogoriyalik himoyachi 2 g‘alaba va 1 mag‘lubiyatni qabul qilib oldi. Qayd etish lozim, u faoliyati davomida 200 ta o‘yinda ishtirok etgan. Ushbu bellashuvlarda "sherlar"ning yangi a’zosi o‘z hisobiga 5 gol va 52 sariq kartochkani yozdirib qo‘ygan.

Martinovich faoliyati davomida Chernogoriya terma jamoasida ham o‘yinlar o‘tkazishga muvaffaq bo‘lgan. U debyutini 2021 yil 27 mart sanasida Gibraltarga qarshi bahsda nishonlagan. Jahon chempionati saralashi doirasida bo‘lib o‘tgan o‘sha bahsda qoratog‘liklar yirik 4:1 hisobida g‘alaba qozonadi. Iliya maydonda 13 daqiqa harakat qiladi. Shundan so‘ng futbolchi terma jamoaning yana 2 uchrashuvida maydonga tushadi. Bosniya va Gersegovina hamda Isroilga qarshi kechgan bellashuvlar qahramonimiz uchun omadli yakunlanmadi. Bosniya bilan nursiz durang qayd etilgan bo‘lsa, Isroilga 3:1 hisobida mag‘lubiyatga uchraldi. Shu tariqa, markaziy himoyachi terma jamoada boshqa ko‘rinish bermadi. Uning hozir 28 yoshda ekanini hisobga olsak, "Paxtakor" safida ishonchli o‘yinlari sabab Iliya yana terma jamoaga chaqirilishi mumkin.

Martinovich "Paxtakor"ga Ukraina klubidagi o‘xshamagan sarguzashtidan so‘ng kelib qo‘shildi. U shu yilning mart oyida "Chernomores" jamoasi bilan shartnoma imzolagan edi. Ammo iyunda futbolchi klub bilan kelishuvni bekor qilishga majbur bo‘ldi. Sababi, mamlakatda yuz berayotgan notinchliklar himoyachiga ma’qul kelmadi va u boshqa chempionatga o‘tishni lozim topdi. O‘sha boshqa chempionat O‘zbekiston Superligasi bo‘lib chiqdi. Futbolchi erkin agent sifatida mamlakatimizning amaldagi chempioni "Paxtakor" bilan shartnoma imzoladi. Kelishuvga ko‘ra, u 2023 yil 31 dekabrga qadar "sherlar" vakili sifatida to‘p tepadi.

Yuqorida biz yangi legioner haqida bor ma’lumotlarni siz bilan bo‘lishishga harakat qildik. Uning faoliyati, halqaro maydondagi tajribasi va boshqa chempionatlardagi natijalari havas qilarli darajada bo‘lmasa ham, yomon deyish ham to‘g‘ri bo‘lmaydi. Umid qilamizki, chernogoriyalik iste’dod sohibi chempionatimizga yaxshi moslashib ketadi. Biz unga omad va zafarlar hamroh bo‘lishini tilab qolamiz.

“Zamin” yangiliklarini “Instagram”da kuzatib boring