Eldor Suyunov: "Shatskix istayotgan futbolni keyingi yil ko‘rsata olishimiz mumkin"

Superliga 14-turidan o‘rin olgan "Paxtakor" - "Dinamo" uchrashuvidan keyin (3:2), mezbonlar darvozaboni Eldor Suyunov o‘z fikrlari bilan o‘rtoqlashdi.

- “Dinamo”ga qarshi 1-davradagi o‘yinga qaraganda, bugungi bahs ancha qiyin o‘tdi.
- Hozirgi kunda O‘zbekiston chempionatida hamma o‘yinlar qiyin o‘tmoqda. Sababi, jamoalarning darajasi deyarli bir xil. Kim kuchli, omadliroq bo‘lsa, o‘sha jamoa muvaffaqiyatga erishmoqda. Shuning uchun bugun qiyin bo‘ldi, keyin esa bu 2-davraning ilk o‘yini. Temp chiqib ketganimi, yutishimiz kerakligi va bosim borligi ham ta’sir qilgandir. O‘yinimiz ham o‘zimiz o‘ylagandek chiqmadi.

- 1-davrada Slavche Voyneski uslubi “Paxtakor”ga tushmadi. Shatskixning g‘oyalari futbolchilarga yoqyaptimi? U xohlayotgan futbol qanday?
- Slavchening ham o‘z uslubi va qarashi bor edi. “Paxtakor”da omadi kelmadi, bu futbol. Murabbiy taqdiri shu. Keyin esa uning o‘rniga Shatskixni olib kelishdi. O‘ylashimcha, u istayotgan futbolni keyingi yil ko‘rsata olishimiz mumkin. Chunki, hech qaysi murabbiy 1 hafta yoki 10 kunda o‘zi xohlagan futbolni jamoaga singdira olmaydi. Bunga harakat qilmoqdamiz, ayni vaqt o‘z pozitsiyamizga qaytib, faqat natija uchun intilmoqdamiz. Shu tufayli, o‘yinimiz ham o‘zimiz xohlagandek chiqmayapti. Shota davridagi futbol tugab, yangi sistemaga o‘tmoqdamiz. O‘tish bosqichidamiz. Xudo xohlasa, bu yil yaxshi natijalarni ko‘rsatsak, keyingi yildan Maksim Shatskix istayotgan futbolni namoyish etolamiz: hujumkor, pressing va faqat oldinga qaratilgan o‘yin.

- Chempionlik poygasidagi asosiy raqiblar.
- Ochkolarni hisobga olsak, hozirgi kunda chempionlik uchun 4-5 ta jamoa kurashmoqda. Musobaqa jadvali ham buni ko‘rsatmoqda. 1-davrada Turkiyada ham aytgandim, menimcha, titul uchun “Paxtakor” va “Nasaf” davogarlik qiladi.

“Zamin” yangiliklarini “Facebook”da kuzatib boring