Italiyalik mutaxassis Shomurodovga qaysi jamoaga o‘tishni maslahat berdi

Rossiya futboli bilan yaxshi tanish bo‘lgan mutaxassis, “Spartak” jamoasining yaqin o‘tmishdagi sobiq bosh murabbiyi Massimo Karrera “Roma”dan ketish arafasida turgan Eldor Shomurodovga A Seriyada qaysi jamoa mos ekanini aytdi.

- To‘g‘risini aytsam, o‘tgan mavsumda Eldorning o‘yinlarini kam ko‘rdim. Menimcha, Shomurodovga “Sassuolo” jamoasi ko‘proq mos tushadi. Chunki bu jamoa yorqin hujumkor futbol namoyish qiladi. Hujumchiga ana shunday jamoada o‘zini ko‘rsatish ancha oson. “Sassuolo” esa hozirgi paytda yaxshi to‘purarga muhtoj, - dedi Massimo Karrera.

Ma’lumki, o‘zbekistonlik futbolchiga Italiyadan “Monsa”, “Sassuolo”, “Bolonya”, Angliyadan “Vulverxempton” va “Saudiya Arabistonidan “Al-Hilol” jiddiy qiziqish bildirayotgani haqida xabarlar tarqatilmoqda.

Massimo Karrera Shomurodovga tavsiya qilgan “Sassuolo” o‘tgan mavsumni 50 ochko bilan 11-pog‘onada yakunladi. Bu jamoa yangi chempionatda Yevrokuboklarga yo‘llanma beradigan o‘rinlar uchun kurashishni maqsad qilgan. Shu bois, murabbiylar shtabi mahoratli hujumchi qidiryapti.

Eldor Shomurodov o‘tgan mavsumni asosan zaxirada o‘tkazdi. O‘zi ishtirok etgan uchrashuvlar soni qiriqtani tashkil qilgan bo‘lsa-da, ko‘pincha bir necha daqiqa o‘yin bilan kifoyalandi xolos. Shunga qaramay, hujumchimiz o‘zi ishtirok etgan barcha turnirlar – A Seriya, Italiya kubogi va Konferensiyalar ligasida raqiblar darvozasini ishg‘ol qilishga erishdi.

Shomurodov mavsumni beshta gol va oltita assist bilan yakunladi. 27 yoshli futbolchining faoliyati davomida klublar miqyosida urgan gollari soni 45 tani, assistlari 27 tani tashkil qildi. Eldor bu ko‘rsatkichlarni jami 221 ta o‘yinda qayd etdi.

Shuningdek, Eldor Shomurodov hisobida O‘zbekiston milliy terma jamoasi safida 56 ta uchrashuv va 30 ta gol bor. “Zamin” yangiliklarini “Instagram”da kuzatib boring