Germaniya, Turkiya va Rossiyadan taklif olgan to‘purarimiz bir qarorga keldi

Belarus chempionati oliy ligasida “Energetik-BGU” sharafini himoya qilayotgan hujumchimiz Bobur Abduxoliqovning o‘yini ancha ochilib ketdi. “Nasaf” tarbiyalagan hujumchi Yevropa tomonlarda tinimsiz gol urmoqda. Ayniqsa, joriy mavsumda Boburni to‘xtatib qoladigan himoyachilarni topib bo‘lmayapti.

Abduxoliqov oliy liganing o‘n beshta uchrashuvida qatnashib, raqiblar darvozasini o‘n olti marotaba ishg‘ol qildi va jamoadoshlariga beshta golli pas uzatdi. Bobur to‘purarlar poygasida yaqqol yetakchilik qilish barobarida gol+pas tizimi bo‘yicha 21 ochko bilan liganing eng foydali o‘yinchisi bo‘lib turibdi.

Bundan tashqari, Bobur Belarus kubogida bitta o‘yinda gol va assist muallifi bo‘lgani ham qayd etilgan.

Tabiiyki, o‘zbek futbolchisining yuqori samaradorligi kuchli ligalar skautlarining nazaridan chetda qolgani yo‘q. Manbalar 25 yoshli to‘purarga Germaniya, Turkiya, Rossiya jamoalaridan jiddiy chorlovlar bo‘layotganini yozmoqda.

Belarus futbolini yoritishga ixtisoslashgan bir necha ommaviy axborot vositalari, xususan, football.by sayti Bobur Abduxoliqovning kelajagiga oid ma’lumot tarqatdi.

Manbaning ta’kidlanishicha, “Energetik-BGU” hujumchini qo‘yib yubormoqchi emas. Boburning o‘zi ham mavsumni minsklik “talabalar” safida o‘tkazmoqchi.

Bunga sabab qilib, “Energetik-BGU” Bobur Abduxoliqov va yana ikki nafar o‘zbek futbolchisi – Abdulqodir Husanov va Shohruhbek Aburahmonov yordamida o‘z tarixida ilk bor chempionat medallari uchun kurashish imkoniga ega bo‘lgani ko‘rsatilmoqda.

Ayni paytda qolgan jamoalardan bitta kam o‘yin o‘tkazgan “Energetik-BGU” 31 ochko bilan ikkinchi o‘rinda bormoqda. Musobaqa peshqadami BATE 16 ta uchrashuvda 32 ochko jamg‘argan. Abduxoliqov jamoasida qoldirilgan o‘yinda zafar quchib, birinchi o‘ringa chiqish imkoniyati bor.

Bundan tashqari, Bobur Abduxoliqov ham “Energetik-BGU” tarkibida shaxsiy ko‘rsatkichlarini yaxshilab olishni mo‘ljallagan. Mohir hujumchimiz 2020 yili O‘zbekiston chempionatida “Nasaf” tarkibida 17 ta gol urgan. Legionerimiz yuqori divizionda gol urish bo‘yicha shaxsiy rekordini yaxshilab olmoqchi.

Shunga qaramay, Bobur Abduxoliqov Belarus chempionatida uzoq qolib ketmaydi. Mavsum yakunlangach, o‘ziga kuchliroq ligadan munosib jamoa tanlash imkoniyati albatta bo‘ladi. Zero, Belarus chempionati o‘zbekistonlik futbolchilar uchun Yevropaning turli ligalariga yo‘l ochib beradigan musobaqa hisoblanadi. Bobur Abduxoliqov singari o‘zing eng yaxshi hislatlarini namoyon eta olgan o‘yinchilarimiz esa, hech qachon to‘xtab qolmaydi. “Zamin” yangiliklarini “Odnoklassniki”da kuzatib boring