"Xo‘jand" ustozi: "So‘g‘diyona" bejiz O‘zbekiston chempionatida yetakchi o‘rinlarda bormayotganini isbotladi"

OFK Kubogi Markaziy mintaqa finalidan o‘rin olgan "Xo‘jand" – "So‘g‘diyona" o‘yinidan keyin mezbonlar bosh murabbiyi Rustam Xo‘jayev matbuot anjumanida ishtirok etdi.

- O‘yin haqida
- Avvalambor, mag‘lubiyat uchun muxlislardan uzr so‘ramoqchiman. O‘yin bo‘yicha fikr bildiradigan bo‘lsam, futbolchilar ko‘rsatmalarimizni to‘g‘ri bajarishmasa, bunday raqibni yutishning mutlaqo iloji yo‘q. Ular bejiz O‘zbekiston chempionatida yetakchi o‘rinlarda bormayotganini isbotlashdi.

O‘yindan oldingi matbuot anjumanida aytganimdek, jamoa o‘z falsafasiga ega, himoyadan hujumga juda tez o‘tadi. Biz aynan shu jihatga ahamiyat qaratib, tayyorgarlik ko‘rgandik, lekin ular ojiz nuqtamizga zarba bera olishdi. Men umid bildirgan tajribali himoyachilar ishonchni oqlay olishmadi.

Albatta, kelgusida o‘yinimizni o‘zgartiramiz. Ammo bu uchun bizga mohir ijrochilar kerak. Hozirgi paytda mavjud futbolchilar orqali o‘yinni shakllantiryapmiz. Darvoza, himoya va hujum haqida to‘xtalsam, yaxshi o‘ynash uchun ko‘rsatmalarni bajarish lozim yoki futbolchida yetarlicha mahorat bo‘lishi kerak.

- Jamoa OFK Kubogidagi yurishini to‘xtatdi. Umuman olganda, "Xo‘jand"ning ushbu mavsumdagi ishtirokini qanday baholaysiz?
- Umuman, guruh bosqichida yaxshi natijaga erishib, pley-offga yo‘l oldik. Ammo bu bosqichda ijobiy natijaga erishish va OFK Kubogida maksimal natija qo‘lga kiritishga hozircha tayyor emasmiz.

- Nima deb o‘ylaysiz, "So‘g‘diyona" ushbu mavsumda nimalarga qodir? Jamoa "Nasaf"ning yo‘lini takrorlay oladimi?
- O‘tgan yili "Nasaf" ushbu musobaqa favoriti ekanligini aytib o‘tgan edim. Hozir esa "So‘g‘diyona"ni favoritlardan biri sifatida ko‘rsatishim mumkin. Jamoa salohiyatli futbolchilar va yuqori o‘yin sifatiga ega. “Zamin” yangiliklarini “Odnoklassniki”da kuzatib boring