Diyor Imomxo‘jayevning "Nasaf" - "Lokomotiv" uchrashuvidagi e’tirozli vaziyatga munosabati

O‘zbekiston Professional futbol ligasi direktori Diyor Imomxo‘jayev kecha bo‘lib o‘tgan "Nasaf" - "Lokomotiv" uchrashuvidan keyin bo‘lgan e’tirozlarga munosabat bildirdi.

Eslatib o‘tamiz, Qarshida bo‘lgan bellashuvning so‘nggi daqiqalarida "temiryo‘lchilar" futbolchisi Kaxi Maxaradze qo‘li bilan o‘ynagan epizod bo‘ldi. Ammo uchrashuv bosh hakami Ahrol Risqullayev qo‘lni tabiiy holatda deb topdi va 11 metrlik jarima belgilamadi.

"Mana shu holat uchun penalti qo‘yish kerak deb hisoblaydiganlar futbolni ko‘rishni kecha boshlagan bo‘lishi katta ehtimol. Bu yerda hech qanday penalti yo‘q.

VAR masalasida esa texnik muammo bor, bu faqatgina VAR videosignalining monitorga yetib kelmasligi bilan bog‘liq. Qolgan barcha holatda VAR to‘liq ishlagan. Futbolchi va murabbiylarning gaplari ham VAR tomonidan aniq-tiniq yozib olingan. Bu Tartib-intizom qo‘mitasi uchun as qotadi.

Monitorga signal yetib kelmasligi so‘nggi 15 daqiqada kuzatilgan. Agar bosh hakam VAR orqali ko‘rishi shart bo‘lgan holat qayd etilganida, takroriy lavhalar B reja bo‘yicha unga planshet orqali taqdim etilardi, deb tushuntirdi Hakamlar markazi. Unutmaslik kerakki, bosh hakam vaziyatni 100 foiz ko‘rgan va aniq xulosa chiqargan bo‘lsa, unda VAR chaqirig‘ini rad qilish huquqi mavjud.

Shunday ekan, kechagi fikrimizda qolamiz. Hakam uchrashuvni juda yaxshi boshqarib bordi. Ketma-ket uch uy o‘yinidan buyon raqib darvozasiga yo‘l topa olmayotgan, ketma-ket to‘rt o‘yindan buyon uy o‘yinida g‘olib chiqa olmayotgan jamoa muammoni boshqa joydan izlashi kerak.

Agar yordam kerak bo‘lsa, faqatgina hakamlar emas, qaysi futbolchi qaysi joyda qanday o‘ynagani, ularning statistikasi qanday va maoshi qancha kabi savollarga javob topishga yordam berib yuboramiz.

Hamma o‘z ishi uchun javob berishi eng to‘g‘ri yo‘l. Futbol hakamlari 30 yil davomida hech qachon hozirgidek shaffofroq va tozaroq ishlamagan. Va albatta xatolardan ular ham siz-u biz kabi kafolatlanmagan", - deb yozdi Diyor Imomxo‘jayev o‘z telegram kanalidi.
“Zamin” yangiliklarini “Vkontakti”da kuzatib boring