Mundial taqvimi. D guruhi jamoalari haqida nimalarni bilishingiz kerak?

^{Daniya milliy jamoasi futbolchilari. Foto Global Look Press}
Kecha, 20 noyabr kuni Qatarda futbol boʻyicha jahon chempionati start oldi. Turnirning final bosqichiga etib kelgan jamoalarning imkoniyatlarini baholaymiz.

A guruhi. Qatar, Ekvador, Senegal, Niderlandiya
V guruhi. Angliya, Eron, AQSh, Uels
C guruhi. Argentina, Saudiyaya Arabistoni, Meksika, Polsha
D guruhi. Frantsiya, Avstraliya, Daniya, Tunis
E guruhi. Ispaniya, Kosta-Rika, Germaniya, Yaponiya
F guruhi. Belgiya, Kanada, Marokash, Xorvatiya
G guruhi. Braziliya, Serbiya, Shveytsariya, Kamerun
H guruhi. Portugaliya, Gana, Urugvay, Janubiy Koreya.

D guruhi. Frantsiya, Avstraliya, Daniya, Tunis

D guruhi taqvimi

22 noyabr
18.00 Daniya — Tunis
00.00 Frantsiya — Avstraliya

26 noyabr
15.00 Tunis — Avstraliya
21.00 Frantsiya — Daniya

30 noyabr
20.00 Tunis — Frantsiya
20.00 Avstraliya — Daniya

Frantsiya
Amaldagi jahon chempionlarida titulni himoya qilish kerak boʻlgan turnir arafasida qator muammolar yuzaga keldi: Karim Benzema, N'Golo Kante, Pol Pogba, Nkunku va Kimpembe jarohat olgan, Kilian Mbappe reklama huquqlari boʻyicha federatsiya bilan mojaroga borgan, Dide Desham esa turnirdan keyin oʻz oʻrnini Zinedin Zidanga boʻshatib berishi haqida aytishmoqda.

Shunga qaramay, Frantsiya top-jamoa boʻlib qolaveradi. Aytish kerakki, Dide Desham jamoasi tavqi la'nat bosimi ostida — soʻnggi uch jahon chempionatida amaldagi gʻoliblarning hech biri guruhdan chiqa olmagan. Ammo, vaziyatga real qaralsa, Frantsiya kamida yarimfinalga etib bora oladigan tarkibga ega.

Avstraliya
Avstraliyaliklar jahon chempionatiga etib kelish uchun qattiq mehnat qilishiga toʻgʻri keldi: birinchi oʻtish oʻyinida BAAni bazoʻr engishdi, keyingisida esa faqat penaltilar seriyasida Perudan oʻtishdi. Avstraliyada hozir Tim Kehill yoki Harri Kyuell darajasida yulduz futbolchi yoʻq, eng taniqli futbolchisi — «Kopenhagen»ning ikkinchi darvozaboni Metyu Rayan. Ularda pley-offga chiqish uchun ham imkoniyat koʻp emas.

Daniya
Evro-2020 yarimfinalchisi Qatarda ham muxlislar mehrini qozonishi mumkin. Daniyada oʻsha turnirdagi tarkib oʻzagi saqlanib qolgan, asosiysi — jamoa etakchisi Kristian Eriksen safga qaytgan. Daniyalik futbolchi oʻyin vaqtida yuragi toʻxtab qolganidan keyin ham yuqori saviyada oʻynashda davom etmoqda, uning tarixi esa jamoadoshlariga qoʻshimcha ishtiyoq beradi.

Daniya guruhdan chiqishi kerak, ammo darhol Argentinaga toʻqnash keladigan boʻlsa, chorakfinal ular uchun armon boʻlib qoladi.

Tunis
Toʻrt yil muqaddam Tunis faqat Panamani enga olgandi, lekin jamoa dastlabki turda Angliyadan ochko olishi ham mumkin boʻlgandi. Hozirda arablar jamoasida yana qiyin guruh va kuchsiz tarkib. Muxlislarning aksari Tunis termasi futbolchilarini tanimaydi.

Tunis uchun guruhdan chiqish sensatsiya boʻladi, ammo afrikaliklar Avstraliya bilan oʻyinda ochko olishi mumkin. “Zamin” yangiliklarini “Telegram”da kuzatib boring