“Roma” kutilmaganda Shomurodov bo‘yicha jiddiy taklifni rad etdi!

A Seriyaning bir necha klublari qishki transferlar vaqtida “Roma” hujumchisi Eldor Shomurodovni o‘z safiga qo‘shib olishni rejalashtirgan.

O‘zbek hujumchisi Joze Mourino jamoasida yetarli o‘yin amaliyotiga ega bo‘lmayapti. Portugaliyalik mutaxassis bir necha pozitsiyada o‘ynay oladigan osiyolik legionerga yetarli darajada imkoniyat berayotgani yo‘q.

Rim klubida markaziy hujumchi vazifasini Temmi Abraxam va Andrea Belotti bajarmoqda. Murabbiylar shtabi ularga yordamchi sifatida oldingi chiziqda Nikolo Dzanolo, Paulo Dibala, Lorenso Pellegrini, Stefan El-Shaaravi, Kristian Volpato kabi o‘yinchilardan foydalanyapti. Eldor asosiy vaqtini zaxirada o‘tkazib yuboryapti.

Eldor Shomurodovning o‘zi ham muntazam o‘yin amaliyotiga ega bo‘lish maqsadida Rimdan ketishga qarshi emasligi aytilmoqda. Biroq, legionerimiz to‘g‘ri kelgan jamoaga o‘tmaydi va yuqori maqsadlar uchun kurashayotgan klubdan taklif kutayotgan edi. Bungacha Eldor autsayder klublardan “Kremoneze”ning taklifini rad etdi.

Nihoyat, Shomurodov o‘tishga moyillik bildirgan klub – “Torino” rimliklarga futbolchi transferi bo‘yicha murojaat qildi.

Futbolga ixtisoslashgan https://romapress.net saytining ma’lum qilishicha, “Torino” Shomurodovni mavsum oxirigacha ijaraga olish bo‘yicha “Roma” mutasaddilari bilan muzokara olib borgan. Manbaning ta’kidlashicha, “Roma” turinliklarning taklifini rad etgan.

Bu ma’lumotlarni tasdiqlagan Tuttosport nashri “Roma” rahbariyati Shomurodov bo‘yicha faqat to‘liq transfer taklifini yoki keyinchalik sotib olish majburiyati bilan ijaraga so‘ragan xaridor taklifini qabul qiladi.

Avvalroq, Shomurodov transferi bo‘yicha “Sampdoriya” ham poytaxt klubi rahbariyatiga murojaat qilgandi. Lekin o‘shanda ham klub sport direktori Tyagu Pinto o‘zbekistonlik forvardga maqbul narx taklif qilingandagina uning transferi muhokama qilinishini aytgan.

Transfer bozorini tahlil qilib borayotgan nufuzli manbalar “Roma” 27 yoshli hujumchisini 11 million yevroga baholamoqda. Rimliklar Eldorni yozda 10 million yevro taklif qilgan “Bolonya”ga ham qo‘yib yubormagan edi.

Aslida hujumchimiz rimliklarga kutilganidan qimmatga tushgan. 2021 yilning yozida Joze Mourino talabini qondirib, Shomurodovni tarkibga qo‘shish uchun klub rahbariyati “Jenoa”ga 18 million yevro to‘lashiga to‘g‘ri kelgan.

Shunga qaramay, Joze Mourino Eldor Shomurodov qanday sport formasida bo‘lishidan qat’iy nazar unga yetarli darajada o‘yin amaliyoti bermayapti. Xususan, bu mavsumda A Seriya va Yevropa ligasida hujumchimiz sakkizta uchrashuvda maydonga tushib, jami 151 daqiqa harakat qildi. Qisqa fursat o‘ynab, bitta to‘p kiritishga ham ulgurdi.

Mutaxassislarning ta’kidlashicha, Shomurodovga qishki transferlar oynasi vaqtida yana takliflar bo‘ladi. “Zamin” yangiliklarini “Youtube”da kuzatib boring