Diyor Turopov nima uchun "Neftchi"ga o‘tib ketganini bilasizmi?

Yodingizdami, o‘tgan yilning ikkinchi yarmida Diyor Turopov “Lokomotiv”ni tark etib, “Navbahor”dan tushgan taklifni qabul qilgandi. Biroq futbolchining namanganliklar safidagi faoliyati uzoqqa cho‘zilmaydigan bo‘ldi. U yerda yarim mavsum o‘ynaganidan so‘ng futbolchi klubini o‘zgartirishga ahd qildi. 30 dekabr kuni “Neftchi” bilan shartnoma imzolaganidan xabaringiz bo‘lsa kerak.

Diyor o‘tgan yili “Lokomotiv”da 9 ta, “Navbahor”da 12 ta o‘yinda maydonga tushdi. “Loko”da 2 ta gol va 1 ta assistni amalga oshirgandi. “Navbahor”da faqat 1 ta assistni bajardi.

Endi uning Namangandagi faoliyati yakuniga yetdi. Ammo Turopov baribir vodiyda qoldi. Bu safar “Neftchi” variantini ma’qul ko‘rdi. Uning mahoratiga shubha yo‘q. "Neftchi" ushbu o‘yinchi misolida yaxshi bir transferni amalga oshirdi. Bu yil 29 yoshni qarshilaydigan Diyor jamoasini o‘zgartirgani haqida biroz to‘xtaldi.

- Diyorjon, "Neftchi" klubiga o‘tganingiz bilan tabriklayman. Avvalo, ayting-chi, "Navbahor"ni tark etish rejangiz bormidi yoki barchasi kutilmaganda yuz berdimi?
- “Navbahor”ni tark etishim qisqa vaqt ichida sodir bo‘ldi.

- Namangandagi faoliyatingiz yarim mavsum davom etdi xolos. O‘tgan vaqt davomida nimadir yoqmadimi yoki boshqa sababi bormi?
- Bu vaqt ichida hech qanaqa salbiy holat kuzatilmadi. Klubda barcha bilan munosabatim yaxshi va shu holatda xayrlashdim.

- “Navbahor”da qisqa vaqt davomida o‘zingiz uchun nima oldingiz va klubga nima bera oldim, deb o‘ylaysiz?
- “Navbahor” uchun borimni berib harakat qildim. Bu vaqt ichida menga faqat gol yetishmadi. Jamoa muxlislariga hurmatim baland. Shu fursatdan foydalanib, “Navbahor” muxlislariga rahmat demoqchiman, bizni yuqori darajada qo‘llab-quvatlashgani uchun.

- “Neftchi” taklifini qabul qilishingizda asosan nimasi sizni o‘ziga jalb qildi?
- Shonli tarixi va klubning o‘z oldiga yuqori maqsadlarni qo‘yganligi uchun “Neftchi” jamoasini tanladim.

- Oxirgi paytlarda "Neftchi"dan "Navbahor"ga va "Navbahor"dan "Neftchi"ga futbolchilar o‘tayotganini ko‘ryapmiz. Masalan, Nurillo To‘xtasinov Farg‘oanaga ketdi. Abror Ismoilov Namanganga keldi va siz ham Farg‘onaga yo‘l oldingiz. Mabodo, ikkala klub kelishuvidan siz bilan Ismoilov o‘rin olmaganmidinglar?!
- “Neftchi”ga o‘tishimda bu narsalarning aloqasi yo‘q.

- Xorijga ham ketishingiz mumkinmidi? Nega legioner sifatida to‘p surish imkoniyatidan foydalanmadingiz?
- Mumkin edi, lekin oilamdagilar bilan maslahatlashib O‘zbekistonda qolishga qaror qildim.

“Zamin” yangiliklarini “Odnoklassniki”da kuzatib boring