“Torino” ham, “Lill” ham Shomurodovdan quruq qolishi mumkin. Uchinchi jamoa Eldor uchun har qanday shartni bajaradi!

Qishki transferlar oynasi oxiriga yaqinlashgani sari Eldor Shomurodovning bozori yanada qaynay boshladi.

“Roma” rahbariyati o‘zbekistonlik hujumchi bilan xayrlashishga tayyorligini bildirganidan keyin A Seriyaning bir necha jamoasi poytaxt klubiga legionerimizni so‘rab murojaat qildi. Xususan, “Monsa”, “Spetsiya”, “Kremoneze”, “Torino”, “Samdoriya”, “Fiorentina”, “Verona”, “Salernitana” kabi jamoalar hamyurtimizni o‘z safiga qo‘shib olishga tayyor edi.

Hozirgacha “Torino” Shomurodovga asosiy da’vogar sifatida tan olinmoqda. Turinliklar bir necha marotaba muzokaraga kirishdi. Ular Eldorning roziligiga ham erishgan. Biroq, “Roma” sport direktori futbolchi uchun badal pulini hozirning o‘zi to‘liq to‘lash yoki to‘lovni yozda amalga oshirish majburiyatini olishni talab qilmoqda.

Hamma klublarga qo‘yilayotgan aynan mana shu talab Shomurodovning transferiga to‘sqinlik qilmoqda.

Milanda bo‘lgan sport direktorlari uchrashuvida turinliklarni Tyagu Pintoni Shomurodovni qo‘yib yuborishga ko‘ndira olmagach, yana bir jiddiy da’vogar chiqdi. Ilgari “Roma”da ishlagan “Lill” bosh murabbiyi Paulu Fonseka o‘zbek hujumchisini Fransiya chempionatiga olib ketmoqchi.

Fransuzlar taklif qilayotgan 13-14 million yevro miqdoridagi pul “Roma” mutasaddilariga manzur keldi. Biroq, Eldor Shomurodov Italiyani tark etishga shoshilmayotgani bu transferni to‘xtatib turibdi.

Nufuzli manbalardan biri - https://footballnews24.it sayti jurnalisti Massimo Rotondining ma’lum qilishicha, Shomurodovdan “Torino” ham, “Lill” ham quruq qolishi mumkin. A Seriya autsayderi “Kremoneze” hujumchiga ega chiqish uchun uchinchi urinishni amalga oshirmoqda. Kremoneliklar bu gal “Roma” qo‘ygan har qanday talabni bajarishga rozi.

“Kremoneze” Italiya chempionatida hali g‘alaba qozonmagan yagona jamoa hisoblanadi. Atigi yetti ochko jamg‘argan kremoneliklarning musobaqa jadvalidagi ahvoli juda og‘ir. Ular katta ehtimol bilan quyi ligaga tushib ketadi.

Eldor Shomurodov buni yaxshi anglab turibdi. Garchi “Kremoneze” Eldorni transfer qilish harakatlarini birinchi boshlagan bo‘lsa-da, ikki marta Shomurodovdan rad javobini oldi.

E’tiborlisi shundaki, Shomurodov ularning taklifini qabul qilmaganiga qaramay, “Kremoneze” hali ham bu transfer uchun jiddiy kurashmoqda.

“Kremoneze” hujumchi uchun kurashayotgani haqidagi xabarlarni taniqli insayder Janluka di Marsioning gianlucadimarzio.com sayti ham tasdiqladi.

Demak, kuzatishda davom etamiz. Shomurodov uchun kurash yanada qizishi kutilmoqda. “Zamin” yangiliklarini “Vkontakti”da kuzatib boring