G‘alaba boy berilgan o‘yinda Shomurodovning o‘yini qanday baholandi?

Eldor Shomurodov yangi jamoasi – “Spetsiya”dagi ikkinchi uchrashuvini o‘tkazdi. Safarda “Empoli”ga qarshi o‘tkazilgan bellashuvda hamyurtimiz to‘liq o‘ynadi.

Eldor Italiya chempionatida oxirgi marotaba qachon 90 daqiqa to‘p tepganini o‘zi ham eslolmasa kerak.

Muhim bellashuv Luka Gotti shogirdlari uchun muvaffaqiyatli boshlangan edi. Legionerimizning hujumdagi sherigi Daniele Verde birinchi bo‘limning o‘zida ikkita to‘p kiritib, jamoasini hisobda oldinga olib chiqdi.

Biroq, “Spetsiya”ga mehmondan uch ochko bilan qaytish nasib qilmadi. To‘qnashuvning ikkinchi yarmida mezbonlardan Nikolo Kambyagi hisobdagi farqni qisqartirgan bo‘lsa, o‘yin yakunlanishi arafasida Emanuel Vinyato jamoasini mag‘lubiyatdan qutqarib qoldi.

Uchrashuvni tahlil qilib borgan https://www.calciomercato.com sayti “Spetsiya” futbolchilarining o‘yinlarini quyidagicha baholadi.

Bartlomey Dragovski 6:
Kaputoning zarbasini ishonchli bartaraf eta oldi. Biroq, ikkita gol urilgan vaziyatda jamoasini qutqara olmadi.

Pshemislav Vishnevski 5.5:
“Empoli”ning birinchi javob to‘pi kiritilgan vaziyatda Kaputo aynan polshalik futbolchidan to‘pni olib qo‘ydi.

Kelvin Amyan 6.5:
Kerakli paytda, kerakli joyda paydo bo‘ldi. Hujumga yordam berdi.

Dimitrios Nikolau 6:
Himoyada chiroyli bo‘lmasa ham, ancha ishonchli harakat qildi.

Emmanuel Gyasi 5.5:
Jamoasining hujumlarini tashkil qilishda suskashtlikka yo‘l qo‘ydi.

Emil Xolm 5.5:
64-daqiqada Gyasi o‘rniga maydonga tushgan bo‘lsa-da, jamoaga hisobni ushlab qolishda yordam bera olmadi.

Mexdi Burabya 5.5:
Bo‘sh o‘ynadi. “Spetsiya” darvozasi ishg‘ol qilingan birinchi vaziyatda Nikolo Kambyagiga qarshi turolmadi.

Salvatore Espozito 5:
Jamoadoshlarini olg‘a boshlashga intildi. Lekin 49-daqiqada ikkinchi marotaba ogohlantirish oldi va maydonni tark etdi. Buning oqibatida jamoa ikki to‘p farqi bilan oldinda borayotgan o‘yinni durang bilan tugatishiga to‘g‘ri keldi.

Kevin Agudelo 5.5:
To‘pga ko‘p tegingan bo‘lsa-da, “Empoli” darvoasiga hech qanday xavf sola bilmadi.

Arkadiush Retsa 5.5:
Vinyato hisobni tenglashtirgan vaziyatda unga xalaqit qila olmadi.

Daniele Verde 7.5:
Birinchi golni penaltidan urdi. Ikkinchisi shunchaki, super gol bo‘ldi.

Albin Ekdal 6:
52-daqiqada uchrashuv qahramoni Verde o‘rniga maydonga tushgan futbolchi maydon markazini ushlab turishga intildi va aksariyat vaziyatlarda buni uddaladi.

Eldor Shomurodov 6:
O‘yinda faol harakat qildi. Bir necha marotaba hujum uyushtirdi. Darvoza tomon zarbalar berdi. Verdening ikkinchi golida ishtirok etgani bilan ajralib turdi.

Luka Gotti 5.5:
Ikkita to‘p farqini saqlab qoladigan taktika tanlay olmadi. Espozitoning o‘yindan chetlatilishi jamoa natijasiga salbiy ta’sir qildi.

“Spetsiya” safar uchrashuvida olingan bir ochko hisobiga umumiy jamg‘argan ochkolarini 19 taga yetkazib, musobaqa jadvalida 17-pog‘onada qoldi.

Endi Eldor Shomurodov jamoasi nvbatdagi bellashuvni 19 fevral kuni o‘z maydonida “Yuventus”ga qarshi o‘tkazadi. “Zamin” yangiliklarini “Youtube”da kuzatib boring