“Paxtakor” klubi tarbiyalanuvchisi Abbosbek Fayzullayev avgust oyida Moskvaning SSKA jamoasi safiga ko‘chib o‘tgan edi.
Yuqori natijalar uchun kurashishni maqsad qilgan SSKAning o‘zbek futbolchisini transfer qilgani hammaga ham yoqqani yo‘q. Bu transferni tanqid qilganlar ham bo‘ldi. Ayrim ekspertlar legionerning yoshligi va qaddi-qomatini pesh qilib, Abbosbekning salohiyatiga shubha bilan qaragan edi.
Ana shunday negativ qarashlarini bildirganlardan biri SSKAning sobiq o‘yinchisi Vladimir Ponomaryov bo‘lgandi.
- Bu futbolchi 19 yoshida nima qilib bera olardi? Uni qanday qilib yetuk futbolchi deyish mumkin? Undan hali ajoyib o‘yinchi chiqadimi? Axir o‘zimizda ham yaxshi yigitlar borku. Ular tarkibga kirishi, o‘ziga bo‘lgan ishonchni uyg‘otishi kerak.
O‘zbekning pozitsiyasida to‘pga egalik qila olish, maydonni yaxshi ko‘rish qobiliyati, yaxshi pas berish, tezkorlik , chidamlilik kabi xislatlarni egallagan futbolchi o‘ynashi kerak. 19 yoshli o‘yinchi bunaqa yuklamalarni ko‘tarishi o‘ta qiyin, - degan edi Vladimir Ponomaryov Fayzullayevning SSKAga transferiga munosabat bildirib.
Legionerimizga uning imkoniyati va salohiyatini past sanagan mutaxassislarning fikrini o‘zgartirishi uchun 45 daqiqa kifoya qildi. SSKAning “Krilya Sovetov” bilan bo‘lgan uchrashuvida ikkinchi bo‘limda maydonga tushgan Abbosbek yuqori saviyada o‘ynadi va jamoasini mag‘lubiyatdan qutilib qolishiga katta hissa qo‘shdi.
Ana shu uchrashuvdan keyin tanqidchilar ham futbolchimizga boshqacha nazar bilan qaray boshladi. Xususan, bu transferni tanqid qilgan Vladimir Ponomaryov Fayzullayevning iqtidorini tan oldi.
— Fayzullayevga balli. O‘yinda raqiblariga g‘ulg‘ula solyapti, to‘p bilan yaxshi yuguryati, har doim ochilishga harakat qilyapti.
Ko‘p mehnat qilayotgani bois muxlislarning ham qalbidan joy oldi. Lekin u mehnat qilishni to‘xtatsa, vaziyat butkul o‘zgarib ketishi mumkin.
Abbosbekning driblingi zo‘r bo‘lishi kerak. Bu borada uning qobiliyati juda yaxshi. Tezkorligi ham talab darajasida, biroq yana o‘sishi kerak.
Bir vaqtlar “Spartak”da Xusainov o‘ynagan. Uning ham bo‘yi baland bo‘lmagan, lekin bu uning bosh bilan gol urishiga ham xalaqit qilmagan edi. Har qanday holatda ham, Fayzullayev o‘z ustida ishlashni to‘xtatmasligi kerak va shunda barcha maqsadlariga erishishi mumkin.
— Fayzullayev mushaklarini chiqarishi shartmi?
— Unda tezligini yo‘qotib qo‘yadi. Bunga misol sifatida bir voqeani esga olish mumkin. 1975 yili xokkey bo‘yicha mashhur murabbiy Tarasov SSKA futbolchilarini boshqarib, asosiy e’tiborni shtanga bilan bajariladigan mashqlarga qaratgan. Mashg‘ulotlarda futbolchilar yelkasida yuk bilan yugurardi. O‘sha mavsumda SSKA futbolchilari oliy ligadan tushib ketishiga bir bahya qolgandi.
Eslatib o‘tamiz, Abbosbek Fayzullayev SSKA klubi bilan 3+1 ko‘rinishida shaxsiy shartnoma imzolagan.
“Zamin” yangiliklarini “Odnoklassniki”da kuzatib boring
