Fransiya chempionatining sakkizinchi turini o‘zbekistonlik futbol ishqibozlari alohida eʼtibor bilan kuzatdi. Liga 1dagi yagona vakilimiz Abduqodir Husanov ikkinchi uchrashuvini o‘tkazdi.
“Lans” bosh murabbiyi Frank Xeyz “Lill”ga qarshi kechgan bahsda 19 yoshli markaziy himoyachini yana boshlang‘ich tarkibda maydonga tushirdi.
Besh kun oldin UYEFA Chempionlar ligasida “Arsenal”ni 2:1 hisobida mag‘lubiyatga uchratgan lansliklar chempionat o‘yinida biroz qiynaldi. Birinchi bo‘lim oxirida gol o‘tkazib yuborgan “Lans” o‘yinning ikkinchi yarmida Deyver Machadoning aniq zarbasi evaziga mag‘lubiyatdan qutilib qoldi – 1:1.
Fransiya futbolini yoritib borayotgan https://www.lensois.com sayti ekspertlari “Lans” tarkibida ushbu bahsda eng yaxshi va eng yomon o‘yin ko‘rsatgan uchtadan futbolchining nomini aniqladi.
Eng yaxshi o‘yinchilar:
Deyver Machado
Maydonga tushishi bilan Deyver Machado boshi bilan aniq zarba berdi. Bu uning mavsumdagi uchinchi goli. Machado vaziyatni o‘zgartirish uchun chap qanotdan hujumga zo‘r berishga harakat qildi. U Pshemislav Frankovskining aniq pasini zoye qilgani yo‘q.
Abduqodir Husanov
Bu gal Abduqodir Husanov “Mes”ga qarshi o‘tkazilgan debyut uchrashuvida ko‘rsatgan o‘yinidek yorqin o‘ynadi, deb bo‘lmaydi. Lekin uning ushbu derbi tonusiga tez qo‘shilib ketganini kuzatish qiziq. O‘z o‘rnida mustahkam turdi, murakkab vaziyatlarda o‘zini yo‘qotib qo‘ygani yo‘q. Ayrim holatlarda biroz aniqlik yetishmadi xolos.
Pshemislav Frankovski
Frankovski jamoadoshi Deyver Machado maydonga tushishi bilan o‘ng qanotga ko‘chib o‘tdi. Bungacha chap qanotda raqib hujumkor futbolchisi Jegrovaga qarshi o‘ynashda ancha ter to‘kishiga to‘g‘ri kelgandi. Qanotni almashtirishi bilan Machadoga golli pas uzatdi.
Eng yomon o‘yinchilar:
Bris Samba
“Lans” posboni “Lill” futbolchisi Benjamin Andrening zarbasini qaytara olmadi. U to‘pning trayektoriyasini aniqlashda xatoga yo‘l qo‘ydi.
Endi Diuf
U atrofdagilarga bergan vaʼdalarini bajarib, o‘zini ko‘rsatishini yana bir kutishga to‘g‘ri keladi. Maydon markazida o‘z joyini hali ham topa olgani yo‘q. Raqib darvozasi tomon juda kam zarba beryapti.
Anjelo Fuljini
Fuljini uchrashuvni juda yaxshi boshladi. Lekin standart vaziyatlardagi noaniq to‘p uzatishlari ijobiy ko‘rsatkichlarini to‘sib qo‘ydi. Keyinchalik harakatlari ham sustlashib qoldi.
“Zamin” yangiliklarini “Vkontakti”da kuzatib boring
