"Ronalduga qarshi to‘p surish - men uchun ulkan sharaf, O‘zbekiston klublaridan takliflar bor"
Tojikistonning birinchi raqamli klubi – “Istiqlol” Osiyo Chempionlar ligasida qatnashayotganidan xabardorsiz. Yaqinda ular Saudiya Arabistonida “Al-Nassr” bilan to‘qnash kelishdi. U yerda jahon yulduzi Ronaldu bor. Ilk bor Tojikiston jamoasi Ronalduga qarshi o‘ynadi.
“Istiqlol” tarkibida muxlislarimizga yaxshi ma’lum bo‘lgan Exsoni Panshanbe ham bor edi. Oxirgi paytlarda uni yana O‘zbekistonga qaytishi mumkinligi borasida ham gap-so‘zlar yo‘q emas. Shu bois Sports.uz muxbiri Exsoni bilan bog‘lanib, Ronalduga qarshi o‘yin va yangi takliflar borasidagi fikrlari bilan qiziqdi.
- Yaqinda Osiyo Chempionlar ligasi guruh bosqichida “Al-Nassr” bilan bahs olib bordinglar. Maydonda Ronalduga qarshi o‘ynaganda nimalarni his qildingiz?
- Barchaga ma’lum, yaqinda Saudiya Arabistoni klublari tarkiblarini jahon miqyosidagi yulduzlar bilan to‘ldirib olishdi. Jumladan, “Al-Nassr” ham. Dunyoning eng taniqli yulduzlaridan biri sanaladigan Ronalduga qarshi maydonda to‘p surish - bu men uchun ulkan sharaf. Chunki u dunyoning eng yaxshi futbolchilaridan biri.
- Uchrashuvdan so‘ng Ronaldu bilan futbolka almashdingizmi?
- Shunday bo‘lsa, qaniydi... Ammo boshqa o‘yinchimiz u bilan o‘zaro almashtirishga ulgurdi. Shunday ekan...Albatta, yaxshi bo‘lardi. Lekin boshqa tomondan olib qaraganda, bu o‘rtog‘imizga og‘ir botmasligini istardik.
- O‘yindan keyin Ronaldu bilan suhbatlashishingiz ham mumkinmi?
- Nega bo‘lmasin! Lekin bu amalga oshmadi...
- Siz uchun kim kuchli: Ronaldumi yoki Messi?!
- Bu ikkisi o‘ta kuchli shaxsiyatlardir. Barchaga ma’lumki, ikkisi 15 yil mobaynida futboldagi eng zo‘r ijrochilar ekanligini isbotlab keldi. Ulardan birini mana shunisi 1-o‘rinda turishga munosib, deya ko‘rsata olmayman. Ammo, aytishim kerakki, baribir Messiga ko‘proq yon bosaman.
- Eshitishimcha, sizga yana O‘zbekiston klublaridan takliflar bor ekan. Superligadan qiziqishlar bo‘layotgani rostmi?
- Ha, O‘zbekistondagi ikki klubdan taklif bor. Qo‘shimchasiga yurtingiz menga begona emas, 2 yil o‘ynadim va chempionatingiz ham chakki emas. Bundan boshqa bir narsa deya olmayman, hammasini vaqt ko‘rsatadi.
- Aslida yana O‘zbekiston chempionatiga qaytish niyatingiz bormi?
- Hozircha mening “Istiqlol” bilan tuzgan shartnomam va klub oldidagi majburiyatlarim bor. Hammasi mavsum yakuniga borganda ma’lum bo‘ladi.
Shuhratbek Jo‘rayev.
“Zamin” yangiliklarini “Telegram”da kuzatib boring
