Abbosbek Fayzullayev joriy mavsumning haqiqiy kashfiyoti bo‘ldi. Bungacha Rossiya Premer-ligasida yorqin o‘yin ko‘rsatib kelayotgan o‘zbek legioneri endi mamlakat kubogi uchrashuvida ham jamoasiga katta foyda keltirdi.
SSKA Rossiya kubogida o‘z guruhida peshqadamlik qilayotgan “Orenburg” futbolchini bilan kuch sinashdi. Guruhdagi so‘nggi uchrashuvda “armiyachilar” 3:1 hisobida zafar quchib, birinchi o‘ringa ko‘tarilib oldi.
Moskvaliklarning g‘alabasiga penalti ishlagan va Fyodor Chalovga golli pas uzatgan Abbos Fayzullayev katta hissa qo‘shdi.
Abbosbek Fayzullayev manfaatlarini himoya qilayotgan futbol agenti Qahhor Mo‘minov o‘zbek futbolchisi nega aynan SSKA jamoasini tanlagani va bir qarorga kelishga qiynalgani haqida gapirib berdi.
- Prosports Management kompaniyasi Abbos Fayzullayevga jamoa tanlashida bosim o‘tkazmalikka qaror qildi. Bir necha variantlarni tayyorlab qo‘ygandik, lekin hal qiluvchi qaror qabul qilishni o‘yinchining o‘ziga qoldirdik.
Abbos qariyb bir hafta o‘yladi, ikkilandi, masalani har tomonlama toroziga qo‘yib ko‘rdi. Keyin German bilan bog‘lanib, shunday dedi: “Men Eldor Shomurodov bilan maslahatlashdim va SSKAga o‘tishni istayman”.
Mana bugunga kelib, futbolchi to‘g‘ri qarorga kelganining guvohi bo‘lib turibmiz. Bu o‘zi va terma jamoasi uchun ham muhim qadam. Hozirning o‘zida Fayzullayev yanada kuchaydi va o‘zbek futbolini yaxshi namoyish qilmoqda.
Umuman olganda, “armiyachilar” bu transfer bo‘yicha uzoq ish olib bordi va qat’iyat bilan harakat qildi.
Joriy yilning mart oyida klub sport direktori Andrey Movsesyan O‘zbekistonga kelib, yoshlar o‘rtasidagi Osiyo chempionatini kuzatdi. Argentinada tashkil etilgan yoshlar o‘rtasidagi jahon chempionatida ham SSKA kuzatuvni davom ettirdi.
Bunday professional ish tutish odamni hayratga solmay qolmaydi. Bizni hayron qoldirgan boshqa jihatlar ham bor.
Masalan, Abbos Rossiyaga kelgunicha ham unga e’tibor ko‘rsatildi. Mubolag‘a qilayotganim yo‘q, lekin futbolchi hali chegarani kesib o‘tmasidan, klub vakillari u bilan aloqani ushlab turdi.
SSKAda futbolchilarni moslashib olishiga mas’ul bo‘lim bor ekan. Klub Yevropa standartlari darajasida ishlayapti. Jamoada yangi futbolchilarga qulay sharoit yaratish uchun hamma ish qilinadi, - deydi Qahhor Mo‘minov.
Eslatib o‘tamiz, Abbosbek Fayzullayev “Paxtakor” tarbiyalanuvchisi hisoblanadi. Iste’dodli futbolchi avgust oyida SSKaga ko‘chib o‘tgan edi.
Fayzullayev yangi jamoasi safida Premer-ligada sakkizta uchrashuvda bitta gol urib, ikkita assist muallifi bo‘ldi. Rossiya kubogi musobaqasida to‘rt marotaba maydonga tushgan hamyurtimiz ikkita golli pas uzatdi.
Abbos SSKAning sentyabr oyidagi eng yaxshi o‘yinchisi, deb topildi. Legionerimiz oktyabr oyining eng yaxshi futbolchisini aniqlash uchun o‘tkazilayotgan so‘rovnomada ham eng ko‘p ovoz to‘plab, yetakchilik qilmoqda.
“Zamin” yangiliklarini “Vkontakti”da kuzatib boring
